Shillong, Lber, 11: Ka kashari District and Session Judge, East Khasi Hills District ka la aibor 10 sngi ia ki Pulit ban kin tohkit ia u Bah Tarson Lymba bad ia u Bah Ebakordor Nongpluh kiba la shah kem ha kaba iadei bad ka jingpynbthei ia u bom IED ha jaka ieng Bos ha Them Iew Mawlong ha ka miet sngi Saitjain jong ka taiew baladep.
U Superintendent of Police ka East Khasi Hills District u Rituraj Ravi ha ka jingiakren bad ka Batesi TV u la ong ba ka jingkem ia u Bah Tarson Lymba na Dawki bad ia u Bah Ebakordor Nongpluh na Malki ka dei halor ka jingioh sabut kaba khlain kaba pynthikna ba kine ki arngut ki dei kiba donkti ha kane ka jingpynbthei bom ha Them Iew Mawlong.
U la ong ba kino kino ki briew kiba donkti ban iasylla ha kane ka kam runar ki Pulit kin hap ban kem bad ban tian bishar ia ki katkum ki kyndon jong ka ain.
U la iathuh ruh ba ka tnat Pulit ka la thaw ia ka kynhun ka ban tohkit bniah na baroh ki liang halor kane ka jingjia bad pynlong ruh ia ka jingtohkit kaba bniah bha. “Ngi la pynkhlaiñ ia ka jingpahara ha baroh ki jaka kiba kongsan bad ha ki jaka kiba lah ban don ha ka jingma bad kumjuh ruh ha nongbah Shillong. Ngi dang wad shuh shuh ia ki briew kiba donkti ha kane ka kam ruh,” la ong u Ravi.
U la maham ruh ba ka tnat Pulit kan ym aili ia kino kino ki briew kiba thmu ban pynthud ia ka shongsuk shongsaiñ bad ia ka jingshngaiñ jong ki paidbah nongshong shnong.
