Shillong, Lber, 11: Ka Khun Hynñiewtrep National Awakening Movement (KHNAM) ha ka Lah Sngi u Blei ka la dawa ia ka Sorkar Pdeng bad Sorkar Jylla ba ki dei ban tep noh ia ka mat tih Uranium hapoh ka Jylla Meghalaya.
“Hadien ba la iohi ia ka jingmih pyrthei biang ka kam tih Uranium ha ka jylla ha kaba kawei ka longkmie Khasi lyngba ka seng shimet ka la phah lane mut phah sha ka Sorkar Pdeng ban sdang biang ka jingtih Uranium, kum ka seng kaba la pyrshah ia ka jingthmu tih ia une u marpoh khyndew naduh ba sdang ngi kwah ban pyntip sha baroh khamtam eh sha ka Sorkar Jylla bad ka Sorkar Pdeng ba ngin iai pyrshah ia kane ka jingthmu bad ba ka Sorkar Pdeng ka dei ban tep noh ia kane ka mat,” ong u kyrwoh ba la phah da u Working President ka KHNAM u Bah Thomas Passah sha ki lad pathai khubor.
“Ka jingsngapjar ka dei ka jingiamynjur namarkata kum ka seng ngi sngewba kan long kaba bakla lada ngi shu sngap ioh don kiba mutdur da kumwei pat ia ki nongrim kiba ka seng ka ieng. Ngi kyrpad ruh ia ki para Khasi jong ngi ba kim dei ban thang biang ia ka ding ba la lip,” u la bynrap.
