Shillong, Lber, 11: Ka seng kieng atiar Hynniewtrep National Liberation Council lyngba u kyrwoh ba la phah sha ki lad pathai khubor ha ka Lah Sngi u Blei da u General secretary cum Publicity secretary Bah Saiñkupar Nongtraw u la pynrem jur ia ka jingkem jong ki Pulit ia u Bah Tarson Lymba da kaba shu pharep ba u dei uba donkti ha ka jingpynbthei ia u bom IED ha Them Metor.
“Kane ka dei tang ka buit treikam jong ki Pulit haba kim iohksai ban kem iano iano ruh bad ong ruh ba u Bah Tarson u dei tang u dkhot uba don bynta ha ka miej jingiakren iasuk bad um dei satia u dkhot lane u nongkyrshan jong ka HNLC. U dei tang uba shu synran ia u Bah Sadon, u ksiang ha ka jingiakren iasuk. Lada ki ksiang nongpyniasuk ki shah pynthud bad shah kem ha ki Pulit, mano shuh na ka kynhun yn dang don jingshaniah ia ka ain ne ia ka sorkar haba ka HNLC ka wan phai na ka bynta ka jingiakren iasuk? ong u Bah Nongtraw.
“Ka paw shynna ba ka Sorkar ka la pynap shrip bad pyniap ia u Bah Cheris, u nongrahktien. Ka long ka jinglehrain ia ki politishian jong ka Jylla Meghalaya kiba dei ki nongiada jong ka riti synshar paidbah, hynrei mynta ka Meghalaya ka la kylla long ka jylla kaba synshar da ki heh saipan bad pyniaid da ki nongsynshar heh spah. Kaba kham sngew lyngngoh ka long ba wat ia u Bah Ebakordor Nongpluh la kem halor kane ka jingjia. Katkum ka jingioh jingtip jong ngi, u Bah Eba u dei tang u nongsyntiat jong ki Pulit,” la kynnoh ka HNLC.
Haba pynpaw ba ka HNLC kam pyrshah satia ka jingsuk, u Bah Nongtraw u la ong, “ka HNLC kam pyrshah satia ia ka jingsuk; ngim dei ki nongbanbein ban leh beiñ. Lada don mano mano ba knieh noh ia ka khyndew ka shyiap jong phi, hato phi tharai ba kan don ka jingsuk. La palat 76 snem, ka India kam pat ju sakhi ia ka shongsuk, lymne kan ioh ia ka jingshongsuk. Ia ka jingsuk yn ym lah ban tei ha ka jingbymiaryngkat, ka jingshah khniot bein, ka jingsngew iapher, ka jingbym don ain, ne ka jingshet kylla namarba kam don ka jingsuk kaba shong nongrum ha ka jingleh bym hok, ka jingshet kylla, ka jingleh shiliang khmat, ka jingleh bym hok, lane ka jingleh donbor.”
“Nga la pule ia ka hitori jong ka Bharat,……..ka histori jong phi, bad ka pynpaw ba phi dei ki nongpyniap briew, ki nongrung tuh, ki nongdakhol, ki nongtuh, ki nongrahbor, ki riew shukor, ki nongleh be-ijot bad ki runar. Nalorkata,, phi la pynkheiñ ia ki soskular bad pynkhein ia ki jingiateh ha baroh ki Jylla synshar syiem. Ka long pyrshah ia phi lada phi ialap ia ka shongsuk bad ka jingialeh ba khlem ia umsnam, ka hok bad ka synshar paidbah. Ki politishian Hynniewtrep, kaba sngewsih, ki la shah pynthame, shah pynbiej bad shah pynbor ha ki nongshun jong ngi bad ha ki nongban bein, bad ki treika kum ki Agent bad ki tyngshop jong ka Sorkar India. Ka jingphiah jong phi bad ka jingpyndonkam da ka polisi pyrshah ia ka ri jong ngi ka dei kaei kaei kaba phin hap ban siew da ka dor. Ka hok ne da kaei kaei!” la kynthoh ka HNLC.
“Phi la donkti ban siat iap bad ban pynmong ia ki dkhot jong ngi. Phi la pyniap ia u Bah Cheris, rahbor ia u Sibsing Syiem, pynbor ia u nongialam jong ngi u Wickliff Syiem ban ryngkangpar, set along bad pyntyrha ia baroh ki nongialam Hynńiewtrep kiba phim sngewtynnat. Phi tharai ba ngi sheptieng bad ngin randien na phi, hynrei EM, ngin wan mareh sha Phi,” la ong shuh shuh u kyrwoh.
