Shillong, ïaïong, 15: Kawei ka longkmie bad ki arngut ki khun ki la shah tait shnong ha ka Dorbar Shnong Lumlakhait, West Jaiñtia Hills District halor ka jingkynnoh ba ka dei kaba don Taro.
Kane ka longkmie kaba la tip kyrteng kum ka Kong Meloris Dhar ka la shah tait shnong bad ki ar ngut ki khun shynrang.
Ha ka ejahar ba la mudui sha u Superintendent of Police ka West Jaiñtia Hills District ha ka sngi Saitjaiñ ka taiew baladep, ki arngut kiba soi kyrteng ha ka ejahar ba kynthup ïa u Thermonki Susngi na ka shnong Nartiang Mudop bad u Diamond Dhar na ka shnong Lumlakhiat ki la kynnoh da kaba pynpaw, “ka Dorbar Shnong ba la ïalam da u Waheh Shnong u Bah Edward Shadap bad u Secretary Shnong u Bah Tisis Phira ki la ai ka jingmynjur ha u Risaw, 2023 bad ha ka 5 tarik, Ïaiong, 2024 ban tait shnong ïa ki lai ngut ki briew kiba kynthup ïa u Biktor Dhar, Balen Dhar bad ïa ka Meloris Dhar.”
Ka jingmudui ka la pyntip shuh shuh, “ki la byrngem byrsit ïa ka ing ka sem bad ïa ka kur ka jait Dhar bad kim shah shuh ban leit trei leit ktah bad ban rep lyngkha ruh.”
“Ngi kyrpad ïa ka ophis ba donburom jong phi ba phin sngewbha ban shimkhia ïa kane, khnang ba ngin ïoh biang ïa ka shongsuk shongsaiñ ha ka iing ka sem bad ha ka shnong ka thaw ruh kumjuh,” la kyrpad ki nongujor ïa u SP.
Ha ka jingïakren bad u nongthoh khubor, u khun jong ka Kong Meloris Dhar u la ïathuh ba ka Dorbar Shnong Lumlikhait ka la pynmih ïa ka hukum ban beh shnong nyngkong eh ha ka 9 tarik Risaw, 2023 halor ka jingkynnoh don Taro tang namarba ki don ki briew kiba la ïohpang hapoh ka shnong Lumlikhait.
U la ïathuh ba ha kane ka dorbar, ki la don ruh ki nongshong shnong kiba la ktah kti ïa ka kmie jong u hynrei da ka jingïada jong ki dkhot ka Village Defence Party (VDP) ka Kong Meloris ka la shu lait da ka said na ka jingshah bom shnong. Shuh shuh u la ïathuh ruh ba ki nongshong shnong ki la byrngem ruh ban thang wat ïa ka ing ka sem.
“Ha kato ka por (ba la pynmih ïa ka hukum ban tait shnong ha u snem 2023) ngim shym la ujor sha ki bor jong ka aiñ bad ngi shu ïakren bad ki bor jong ka shnong hynrei katba nangïaid ki sngi ki pyneh beit ïa ka rai. Hadien kata, la pynlong biang ïa ka dorbar ha ka 5 tarik Ïaiong, mynta u snem bad ki la ïakren ïa kane ka kajuh ka mat bad ki la shim ïa ka rai ban tait shnong,” ong u khun jong ka Kong Meloris.
Ka Meloris Dhar, ka la ïathuh ba ka Dorbar Shnong kam shah satia wat tang ban rah eiei na la ing hadien shitaiew tam ba la mih na shnong ban leit sah noh sha ka shnong Namdong.
U la ïathuh ruh ba ka dorbar shnong ka la byrngem ïa i mei ba im bit shuh ban leit rep leit riang, wat ban shong ban sah hapoh iing.
Shuh shuh u la pyntip hadien ba la mudui ïa ka ejahar ha Jowai Police Station ki Pulit ka Saitsama Out Post ki la leit sha Lumlakhiat ban pynlong ïa ka jingtohkit.
“Nga pynrem jur ïa kane ka kam bad ngim pdiang namarba u rangbah shnong kim don ka bor ban leh kumta (tait shnong). Ngi la rai ban ïakhun beit haduh ba kut,” u la ong.
Kane ka ing ka sem ka la ujor ruh sha ka Meghalaya Human Rights Commission ban tuklar lem halor kane ka kam bad ban pynïoh ïa ka hok jong ki kum ki nongshong shnong.
