Shillong, Nohprah, 05: U Director General of Police (DGP) ka Meghalaya u Dr. L. R Bishnoi u la pyntip ba ki don haduh 2.5 lak ngut kiba pyndonkam ïa u drok ha ka jylla.
Haba kren ha ka jingpyllait paidbah ïa ka DREAM project ha Shillong, u Dr. Bishnoi u la ong ba ka Ministry of Social Justice and Empowerment, ka Sorkar India ka la pynlong ïa ka jingsorjamin ha ka ri baroh kawei bad kynthup ruh ha ki Union Territories.
“Ha u snem 2019 ka Ministry ka la ai jingkheiñ ba ki don 7.5 klur ngut ki nongdih drok ha ka ri bad ki don 2.5 lak ngut ki nongdih drok ha Meghalaya” la ong u Dr. Bishnoi.
U la ong ba ka Meghalaya ka dei kaba ïajan tam eh bad ka Golden Triangle kaba ju pyndonkam da ki snar khaïi drok kum ka lynti ïaid, ba kynthup ïa ka ri Myanmar, Thailand bad Laos namarba ka jingpynmih ïa u Opium, Heroine bad kiwei kiwei ki jait jingdih ba sniew la pynmih na kine ki ri.
U la bynrap, naduh ba ka Meghalaya ka la long ka khyrdop rung bad mih, mynta ka la long ka ktem jong ki nongkhaïi drok.
“Mynta ki nongpyndonkam ïa u drok ha ka jylla ka la nang kiew artet, mynshwa ka long tang ha ki jaka sor, hynrei mynta ka la rung wat sha ki nongkyndong. Mynshwa kiba dih drok ki dei tang ki shynrang hynrei mynta wat ki samla kynthei ba dang rit ka rta ruh ki ngop ha ka jingdih drok,” u la bynrap.
U DGP u la kam ba ka jingpyndkam ïa u drok, kan ïalam sha ka jingmih ki kam runar ruser bad ka jingïapait hapoh ka ing ka sem bad ki jingjia aksiden.
“Phin sngew lynngoh ba tang ha nongbah Shillong ki don 4 haduh 5 tyllli ki Cases jong ka jingïapait shiiing shisem ba la ujor manla ka sngi sha ki thanat bad manla ka sngi, 3-4 tylli ki jingjia aksiden ki jia ha nongbah Shillong bad haba ngi tohkit shaphang kata, ka daw ka long na u drok bad na ka kiad,” la ïathuh u Dr. Bishnoi.
U la ïathuh ba ha u snem 2022, haduh 116 tylli ki Case la rejistar hapoh ka NDPS Act bad 234 ngut ki briew ki la shah kem bad tang ha une u snem 2023 kumba 183 tylli ki case la rejister bad 349 ngut ki la shah kem.
“Ha u snem 2022, ngi la kurup haduh 7 kilo tam u drok heroin bad ha u snem 2023, ngi la kurup 16.7 kilo bad 1 kilo u drok heroin uba don ïa ka bor ban pynlong ïa ki 200 ngut ki briew ki ban im kyrni ha u drok,” u la bynrap.
Haba ïadei bad Ganja, u DGP u la ïathuh ba ha u snem 2022, haduh 1,400 kilo la ïoh ban kurup bad tang ha une u snem ka la kiew sha ka 4,000 hajar kilo, 13,000 tylli ki dawai kuli Yabba ba la kurup ha u snem 2022 bad 61,000 tylli ha kurup ha u snem 2023.
U la bynrap ruh ba ha u snem baladep, haduh 17,000 tylli ki dawai kuli Psychrotrophic Tablets la ïoh ban kurup bad mynta u snem 44,000 tylli la ïoh ban kurup bad ka dawai jyrhoh ba la ïoh kurup ha u snem baladep ka long 27,000 tylli bad mynta u snem ki Pulit ki la ïoh ban kurup 1.5 lak tylli.
“Ha u snem baladep ngi la kurup ruh ïa ka pisa na ki nongkhaïi drok kaba kot T. 37 lak bad mynta u snem ka la kiew sha ka T. 47 lak,” la ïathuh shuh shuh u Dr. Bishnoi.
