Shillong, Nohprah, 05: U Myntri ka tnat Jngohkai Pyrthei u Bah Paul Lyngdoh ha ka sngi Baar u la byrngem ban mudui da ka ‘Defamation Case’ halor ka khubor kaba kynnoh ba ka don ka jyrsieh bamsap kaba T.1300 klur ha ka jingpyntreikam ïa ka Eco-Tourism Project ha East Garo Hills (EGH).
Ha ka jingïakren bad ki lad pathai khubor u Bah Paul u la kyntait war ba kam don satia kano kano ka jyrsieh bamsap ha ka Eco-Tourism Project ha East Garo Hills bad ong ruh ba ka Rural eco-tourism Circuit Project ha Garo Hills ka dei kaba la mang pisa da ka North Eastern Council (NEC) ha u snem 2017 na ka bynta 12 tylli ki project, ha kaba 9 tylli ki dei ha East Garo Hills, kawei ha West Garo Hills bad ar tylli ha South West Garo Hills ha ka jinglut kaba kot T. 14.39 klur.
U la ïathuh ba kawei kawei ka projek ka kynthup ïa ka jingshna ïa ka Traditional Dwelling Cottages ba don bad ka jingthiah, ka kamra shongkai, ka paiñkhana, ka jaka peitkai bad kiwei kiwei kaba kot T. 9.91 lak bad haduh mynta 955 na ki kam la lah ban trei pyndep.
“Na ka T. 14.39 klur, haduh T. 1361.45 lak ladep siew sha ki Kontraktor ba pyntrei ïa ka kam ba la p yndep bad ki don pat ki kam kiba dang sah ban pyndep noh artat,” u la ong.
U Myntri u la pyntip ba ki don bun tylli ki daw kaba pynslem ban pyndep ïa kine ki projek na ka daw ka jingdon jong ka elekshon shiteng samoi ha East Garo Hills, ka jingwan lynshop ka khlam COVID-19, ka jingpyrkhing ban leit ban wan jong ki nongbylla na ka daw u COVID bad ka jingbym don ki surok kiba biang ban poi sha ki jaka ba pyntrei nalor ka jingpynthud jong u slap bad kiwei kiwei de ki daw.
Na ka liang jong u Myntri Rangbah ka Jyllla u Conrad K Sangma ruh u la kyntait war halor ka jingkynnoh ba ka don ka jyrsieh bamsap ha ka jingpyntreikam ïa ka song pisa kaba kot T.13 klur jong ka Eco-tourism Project
“Haba kane ka khubor ka la mih, ka jinglap jong ki bad ki jingkheiñ ki dei kiba bakla suda bad ka khubor ka dei kaba la ïalam bakla nadong shadong. Ki jingkheiñ ki bakla. Ka dei ka projek ba 13 klur bad ki don kumba 8-9 tylli ki jaka ba la shna ïa ka projek.
“U nonglum khubor u dei ban da tih bniah bad ban da wad jingtip thikna shwa ban pynmih ïa kine ki khubor, bad ym dei ban shu ïalam bakla ïa ki paidbah,” u la bynrap.
