Shillong, Nohprah, 03: U Myntri Rangbah ka Jylla u Conrad Kongkal Sangma ha ka sngi baar u la kular hakhmat ki nongtrei COVID-19 Emergency Care Services Staff ba la thung kontrak da ka tnat ka Koit ka Khiah bad ka Sorkar kan sa siew dep ïa ka tulop jong ki hapoh ka 10 tarik mynta u bnai.
“Ngi la rai ban ai por khatduh ïa ka Sorkar haduh ka 11 tarik, mynta u bnai, lada ka tulop kam poi, ngin pynlong da ka jingshah thngan hakhmat ka ophis Secretariat ha ka 15 tarik mynta u bnai,” la ong u Bah Kasperline ïawphniaw ha ka jingïakren bad ki lad pathai khubor hadien ka jingïakynduh ïa u Myntri Rangbah.
Shwa kane, kata, ha ka por mynstep, kine ki nongtrei COVID-19 na rilum Khasi-Jaiñtia bad na rilum Garo ki la tur paidbah sha ka ophis Directorate of Health Services (MI) ban dawa ïa la ka jong ka bainong kaba kim shym la ïoh mynta la kumba 6 ne 7 bnai kynthih.
U Bah Kasparline u la ïathuh ba ka DHS ka la pynshai ba baroh ki kot ki sla kiba ïadei bad ka tulop jong ki nongtrei ladep phah lut sha ka Sorkar bad ka shong pat sa ha ka Sorkar ban pyndep ïa ka kamram kaba sah.
Ka jingpan jingpynshai na ka DHS ka long hadien ba uwei na ki nongwad RTI Bah Disparsing Rani u la lap lyngba ka jubab RTI ba ka pisa ba ka Sorkar Pdeng ka la mang ban ïarap ïa ka jylla Meghalaya ka dang sah sa 43 klur tyngka.
“Dei halor kane ka daw, ngi la wad jingtip na ka DHS hadien ba ka ong bym don pisa. Ngi la ïakynduh ruh ïa ka Myntri ka Koit ka Khiah ka Dr. Ampareen Lyngdoh hynrei ka kren kyllaiñ pynban da kumne kumtai bad ka khynñiat sha ki Dealing Assistant. Ha ka jingtih bniah, ngi la leit tohkit ruh na ki ophisar jong ka tnat Pla Tyngka jong ka sorkar,” la ong u Bah Kasperline.
U la pyntip ruh ba ha ka jingïakynduh markhmat bad u Myntri Rangbah, kane ka kynhun ka la kyrpad ïa ka Sorkar ban thungkam biang sa shisien namarba bun na ki nongtrei ki dei kiba la don jingtbit namarba ki dei kiba la trei naduh ka por ba ka khlam COVID-19 ka la wan lynshop ha kane ka jylla Meghalaya ha ka sien banyngkong ha u snem 2020 bad ha u snem 2021.
“U Myntri Rangbah um shym la ai kano kano ka jingkular hynrei u la pyntip ba un sa shong bishar bad ban lum ïa ka jingïalang shwa ban shim ïa ka rai,” la ïathuh u Bah Kasperline.
Shuh shuh u la ïathuh ba ka tnat ka Koit ka Khiah lyngba ka DHS bad ki District Medical & Health Officer (DM&HO) ki la thungkam ïa ki hajar ngut ki briew ha ka por ba dang wan lynshop nyngkong eh ka khlam COVID-19 hynrei kiba bun ki la iehnohkam ïa ka kam tang shu phah leit sha ki kamram COVID-19.
“Ki tieng ban trei ha ki COVID Ward. Ki don pat kiba ïai neh ha ka kam naduh ka por ba dang sdang ka jingpang COVID-19 nyngkong eh bad kiba dang trei haduh ban da shah pynkut ha u Nailur, mynta u snem,” la ïathuh u Bah Kasperline.
U la pyntip ba ka DHS ka ladep phah da ka jingthoh sha ka Sorkar ba ka tnat ka Koit ka Khiah ka donkam bha ïa ki briew kiba la tbit bad kiba la trei ha ka por ba la wan lynshop ka jingpang khlam COVID-19. Ngi la pynsngew ha u Myntri Rangbah ïa kane bad u la ong ba un sa bishar shwa ïa kine ki jingpynsngew.
