Shillong, Nailur, 17: Ka Joint Action Committee (JAC) Dong Namchiang, Elaka Narpuh, East Jaiñtia Hills District ka la ai por tang 2 taiew ïa ka Sorkar Jylla bad ïa ka National Highways and Infrastructure Development Corporation Limited (NHIDCL) ban maramot noh ïa ka surokbah National Highway-6 naduh ka shnong Tongseng haduh Ratacherra Malidor.
Ka JAC Dong Namchiang ka la byrngem ruh ban long ïa ka jingïakhih lada ka NHIDCL kam lah ban pynurlong ïa kane ka jingdawa hapoh ar taiew.
U Chairman jong ka JAC Dong Namchiang u Bah Lasting Pala ha u kyrwoh ba la phah sha ka Batesi Tv u la ong, “kumba long mynta ki paitbah babun balang ki la jynjar palat namar ka jingdheng kali kaba manla ka sngi na ka daw ka jingsniew palat pud jong ka surok na ka jingjot bad ka jingbun sa tang ki thliew kiba heh hapdeng surok.”
“Mynta la dei ka por ba rang slap ka la ktah haduh katta katta ïa ka koit ka khiah jong ki nongleit nongwan bad ïa ki nongshong shnong khamtam ïa ki khynnah skul namarba ka surok ka la her da u pum pum haba ïaid ki kali,” ong u kyrwoh.
“Na ka liang jong ka JAC na ka por sha ka por ngi la ïaiban bad ngi la kyntu ïa ka NHAI/NHIDCL ban maramot noh ïa kane ka surok, hynrei ka jubab ka ngi ïoh ka long ba ki dang pyntrei ïa ki nala. Katkum ka jingïohi jong ka JAC ba ka jingtrei kam ka suki shaba palat bad lada ïai ap haduh ban da dep ka nala ka mut ba ki paitbah kin ïai mad ïa ka jingeh ha ka leit ka wan na ka daw ka jingbym shimkhia jong ka NHAI/NHIDCL,” bynrap u kyrwoh.
“Ka JAC ka dawa jur ïa ka NHAI/NHIDCL ban pyndap ïa ki thliew ha shilynter jong ka surok katba dang ïaid ka jingshna nala. Ha kajuh ka por ka dei ruh ban pynkloi noh ban siang rong khnang ba kan pynsuk ïa ka leit ka wan jong ki paitbah. Lada kane ka jingdawa jong ngi kam urlong hapoh ar taiew ngin sa pynlong biang ïa ka jingïakhih paitbah,” la pynkut u kyrwoh.
