Shillong, Nohprah, 07: Ka Kashari jong u Special Judge (POCSO), Shillong u M. Kumar ha ka 6 tarik mynta u bnai ka la rai pynrem bad ai jingpynsajia ïa u Dresstar Kurbah da kaba set along 20 snem bad ryngkat ka jingshaiñ kuna kaba 10 hajar tyngka.
Ha u kyrwoh ba la phah da u Superintendent of Police ka East Khasi Hills, Bah S. Nongtnger, u la pyntip, ha ka 2 tarik, Naiwieng, 2021 ki Pulit jong ka Mawlai Police Station ki la ïoh pdiang ïa ka ejahar ba la kynnoh ba kawei ka khynnah kaba la 15 snem ka rta ka la shah leh be-ijot ha u Dresstar Kurbah ha u bnai Jylliew, 2021.
Ki Pulit ki la register case ha Mawlai Police Station hapoh ka Section 5(j) (ii)/6 POCSO Act bad ïa ka jingtohkit la bynshet ha ka WP/Sub-Inspector Lavinia S. Kongwang.
Hadien ba la pyndep ïa ka jingtohkit halor kane ka jingjia, la pynngat kyndon pyrshah ïa u nongleh kam bymman ha ka 12 tarik, Kyllalyngkot, 2022.
