Mawkyrwat, Nohprah 08: Ha ka sien banyngkong eh ki doktor jong ka Mawkyrwat Civil Hospital ki la shim ïa ka rai ba nyngkong eh ban puid nongpang hapoh kane ka jaka ai jingsumar.
U Medical Superintendent jong ka Mawkyrwat Civil Hospital u Dr. W. Sutnga u la ïathuh naduh ba la plie ïa kane ka jaka sumar ba 100 jingthiah mynta la kumba shi snem duna, kum u khlieh duh jong kane ka jaka sumar ryngkat bad ki nongtrei baroh u la pyrshang katba lah ban ai ka jingshakri kaba bha bad thaw ki lad ki lynti ban pynbiang ïa ki jingdonkam, kata, naduh ki nongtrei bad kumjuh ruh na ka bynta kiba wan shim dawai bad kiba wan thiah pang, hynrei hapdeng kita ki jingpyrshang ba rit, ki dang don ruh ki jingduna hangne hangtai.
U Bah Jrimson Shangdiar, uba 72 snem ka rta uba don ka jingpang ha ki bynta jong ka kjat mynta la kumba 50 snem ei ei na ka shnong Manad, South West Khasi Hills District u dei uba nyngkong eh ban shah puid hapoh kane ka jaka sumar.
U Dr. Sutnga u la ong ruh ba nangne shakhmat na ka bynta kiwei ki jingsumar yn sa ïaleh bad ïaid shakhmat, hynrei kaei kaba donkam mynta ka long ba lada donkam snam, ha kane ka jaka sumar ki dang shem jynjar namar ym pat don ïa ka Blood Storage.
Ha kaba ïa dei bad ki tiar ki tar, u Dr. Sutnga u la ong ba ka jingïarap markylliang ne jingkyrshan na kawei ka jaka sumar sha kawei pat ka long kaba donkam, kumta ka jingïatreilang ka lah ban wanrah ïa u soh jong ka jingjop ha kano kano ka jingthmu. Kumta u kyrmen ba da ka jingwan ïuh kjat jong ka Myntri ka tnad ka Koit ka Khiah ka Dr. Ampareen Lyngdoh ha ka sngi Palei yn sa lah ban pynbiang ha i por ba lyngkot.
U la kyrpad bad ai mynsiem ïa ki paidbah nongshong shnong jong ka South West Khasi Hills District ba ki dei ban wan shakhmat ban phah sumar ïa ki jingpang ba ki don namar ïa kaei kaba na ka liang ki doktor ki lah ban leh ïa kata kin pyrshang.
Shwa ban rung sha ka kamram puid, u Bah Jrimson Shangdiar ha ka jingiakren bad ki lad pathai khubor u la ïathuh ba kane ka jingpang ha ki bynta jong ka kjat ka la bat ïa u mynta ka kumba 50 snem eiei ha kaba naduh dang khynnah u la kum bakla bad theh da ka umphniang sharak bad kem ding ha ka patlun. U la ong ba u hun beit ha ka kti jong ki doktor ban sumar wat lada u poi ha ka jingïap ruh.
U la ong ban ot ïa ka kjat um da sngew don mon namar u dang don ka jingkyrmen ba hadien ka jingshah sumar un sa lah biang ban ïaid bad ha kajuh ka por u la pynpaw ia ka jingkyrmen lyngba ka jingsumar jong ki doktor bad ki nurse un sa ïoh biang ka jingkoit jingkhiah.
