Shillong, Nohprah, 09: Lai ngut ki samla kiba donkti ban leh “Stunt” ha Laitumkhrah, Shillong ha ka step jong ka 1 tarik mynta u bnai ki la shah kem ha ki Pulit jong ka Laitumkhrah Police Station bad ia ka kali ruh la kurup noh da ki Pulit na ka sem set kali kaba don ha ka shnong Kynton-u-Mon, Laitkor, East Khasi Hills District.
Ha u kyrwoh ba la phah sha ki lad pathai khubor ha ka sngi Saitjaiñ, u Superintendent of Police (City) East Khasi Hills District Bah Vivek Syiem u la iathuh ba ha ka 1 tarik, Nohprah, 2023, kawei ka kali Maruti 800, rong lieh ka bym don ia u number plate la ioh ring video ia ka rukom niah kali kaba ima bha ha Laitumkhrah Police Point. La iohi ba kane ka kali ka la tynrah ruh wat ia ka kynroh pyllun ha Laitumkhrah Police Point. Hadien kane ka jingjia ki Pulit ki ujor da ka suo-moto case ha Laitumkhrah Police Station hapoh ka Section 279 Indian Penal Code (IPC) bad hapoh kiwei pat ki Section bapher bapher jong ka Motor Vehicle Act.
Namar ba ka video ba la ioh ring ka dei kaba la saphriang bha ha ka rynsan jong ka Social Media na ka liang jong ka Dorbar Shnong Laitumkhrah Pyllun ruh ka la mudui da ka ejahar Laitumkhrah Police Station ha kaba ki Pulit ki la bynrap lang ia kane ka ejahar bad ka jingujor suo-moto.
Ki Pulit ka Laitumkhrah Police Station ba la lamkhmat da u Officer Incharge, ha ka jingtohkit ki la ioh kurup ia ka kali na ka sem set kali na ka shnong Laitkor Kynton-u-mon. Lai ngut kiba donkti ha kane ka jingniah kali ki la shah kem bad ki la phla ruh ba ki la leh ia kane ka kam hadien ba ki la shongshit khawyiang.
U SP u la iathuh ba kane ka kali ka dei kaba don ia u registration number ML05 U 4845 bad ia kine ki lai ngut kiba donkti la ialam sha Laitumkhrah Police Station na ka bynta ban pynlong ia ka jingtohkit.
Ka tnat Pulit ka la kyrpad ia ki samla ba kin kiar na kaba leh ‘Stunt’ haba niah kali namarba ym tangba ka buh ia ki ha ka jingmynsaw hynrei ka buh jingma ruh wat ia kiwei pat kiba iaid lynti ha surok.
Shuh shuh ka tnat Pulit ka la kyrpad ia ki paidbah ba kin pyntip sha ki Pulit lyngba u nombar 112 lada ki lap ia kum kine ki jingjia nangne shakhmat.
