Shillong, Nohprah, 06: Ryngkat lang bad ka ri India baroh kawei, ka tnad Home Guard and Civil Defence ka Jylla Meghalaya ha ka sngi Balang ka la rakhe ïa ka All India Home Guards and Civil Defence Raising Day 2023.
Ha kane ka jingrakhe kaba la long ha Headquarter jong ka tnat Home Guards and Civil Defence kaba don ha Mawdiangdiang, la sakhi lang da u Myntri ka Sorkar Jylla uba peit ïa ka tnat Home Guards and Civil Defence Bah Bah Coming One Ymbon uba la long kum u Kongsan ryngkat ka jingdonlang jong ka Director General ka Kong I.Nongrang, ki Pulit Ophisar jong ka tnat Home Guards and Civil Defence bad kiwei kiwei.
U Bah Coming One Ymbon haba kren kum u Kongsan u la ong ba ka jingïatreilang jong ki Pulit Home Guards Volunteers ban pynïaid beit ïa ka jingdheng kali, ka jingpahara ïa ka Ingdorbar Thawaiñ, bad ka jingïarap ïa ki Pulit ha kiba bun ki liang ka la long ka jingmyntoi haduh katta katta.
U la ong ba ki Home Guard Volunteer bad ka tnat Pulit ki la ong ki ar tylli ki tnat treikam kiba la ïarap ïa ki bor synshar district ban peit ïa ka shongsuk shongsaiñ haba wan ki heh ki haiñ sha ka Jylla.
U la ai jingïaroh ïa kane ka kynhun kaba ju ai jinghikai sha ki paidbah nongshong shnong kumno ban ïada bad ai jingïarap ïa kiwei pat haba wan ki jinglynshop na ki bor ka mariang.
“Da ki jinghikai ba ka tnat Civil Defence ka ju ai barabor ka la pynmyntoi haduh katta katta ïa ki Dorbar Shnong, Nokma bad ïa ki paidbah,” ula ong.
U Myntri u la pyntip ruh ba ka tnat ka ladep ai jinghikai pyntbit ïa ki 7110 ngut ki paidbah bad ïa ki khynnah skul ha ka Disaster Management, Search & Rescue bad First Aid ha ki sor bad khapsor.
Shuh shuh u la bynrap ba ha u snem 2022-23, haduh 2531 ngut ki Home Guards Volunteers bad 330 ngut ki Civil Defence Volunteers ki la ïoh jinghikai. U la ïathuh ki don kumba 1391 ngut ki Home Guards Volunteers ba la ïoh jinghikai.
Shwa kane, u Kongsan u la aiti ïa ki medal na ka bynta ka Home Guards and Civil Defence Medal for Meritorious Service sha ki san ngut ki Civil Defence bad Home Guards. U la sam ruh ïa ka Director General Civil Defence Disc & Commendation Certificate, MHA, New Delhi 2022 sha ki 12 ngut ki nongïoh khusnam.
Ka Director General of Civil Defence & Home Guards, Meghalaya Kong I. Nongrang ka la sam ïa ka khusnam pisa kaba la tip kum ka Director General of Civil Defence and Home Guards, Meghalaya bad ka Commendation Certificate, 2021 sha ki hynriew ngut ki Pulit CD &HG.
Ka Kong MW Nongbri kaba long ka Executive Director jong ka State Disaster Management Authority (SDMA), ka Kong C. Kharkongor kaba long ka Secretary jong ka tnat Civil Defence & Home Guards, u A Agarwal, uba dei u Inspector General of Police, CRPF, u MK Sangma uba dei u Joint Director jong ka Civil Defence, Meghalaya, bad u Bah RP Khongwar uba dei u Joint Commandant General of Home Guards, Meghalaya bad u Bah V. Syiem, SP City ki la sakhi lang ha kane ka sngi.
