Khliehriat, Risaw 10: Ka Khasi Students’ Union (KSU), lyngba ka East Jaintia Hills District Unit, ka la nang pynïar ïa ka tnum treikam da kaba pynkha sa ïa kawei ka shnat thymmai ha ka shnong Suchen, kaba la tip kum ka KSU Suchen Pyllun Unit.
Ha ka jingïalang pynskhem ïa kane ka Unit thymmai, la ïadonlang ki nongïalam jong ka KSU na ka Sengkmie bad na ki Circle bapher bapher. U Shiningstar Kharbihkhiew, Environment Secretary ka KSU CEC, u la shim ïa ka bynta ban pyntian smai ïa ki nongïalam bad ki dkhot jong ka Suchen Pyllun Unit.
Kiwei pat kiba la ïadonlang ki kynthup ïa u Andrew Gary Dkhar, Assistant Education Secretary; u Dannyson Langpen, Vice-President ka KSU Malki Circle; u Stream N. Suchen, President ka KSU East Jaintia Hills District Unit, bad ki nongïalam na ka Khliehriat bad Wapung Circle.
Haba kren ha ka jingïalang, u Kharbihkhiew u la pynkynmaw ïa ki dkhot ba kum ka jaidbynriew, ki dei ban don ka jingsngewkhia ïa ka ri bad ka jaidbynriew. U la ong ba ka ri ka dei ka khyndew ka shyiap kaba dei ban ïada bad sumar, ym ban lilam. U la kyntu ruh ïa ki dkhot jong ka KSU ba kin don ka nongrim kaba skhem haba ki shakri ïa ka seng bad ïa ka jaidbynriew.
Ïa ka jingïalang la pynïaid da u Pynshai Kupar Dkhar, Assistant Secretary ka KSU East Jaintia Hills District Unit, bad la ïoh ruh ïa ki jingkren na kiwei pat ki nongïalam jong ka seng.
U Hermon Suchen, uba la shah jied kum u President ba thymmai jong ka KSU Suchen Pyllun Unit, u la kyrpad ïa baroh ki dkhot ba kin ïatreilang bad pynskhem ïa ka jingïatylli. U la kyntu ruh ba ka Unit kan ïatreilang bad ki bor shnong ha ki kam bapher bapher kiba ïadei bad ka bha ka miat jong ka shnong bad ka imlang sahlang.
