Shillong, Nailur, 23: Kum shi bynta ban pynsuk shuh shuh ïa ka leit ka wan jong ki paidbah nongshong ka jylla Meghalaya bad ïa ki briew kiba nabar ka jylla, ka Sorkar Jylla lyngba ka tnad Transport ka la don jingthmu ban pynheh shuh shuh ïa ka kad liengsuiñ Shillong kaba don ha ka shnong Umroi, Ribhoi Distirct da kaba thmu ruh ban pyntreikam baroh 24 kynta ha ka shitaiew.
Kane ka la wan hadien ba u Symbud Myntri Rangbah ka jylla u Bah Sniawbhalang Dhar ha ka Lah Sngi u Blei u la leit jurip ïa kane ka kad liengsuiñ ryngkat ka jingsynran lang jong u Chief Secretary ka Jylla u Bah Donald P. Wahlang, u MLA ka Umroi u Bah Damanbait Lamare, u Deputy Commissioner jong ka Ri Bhoi District u Abhilash Baranwal, u Commissioner & Secretary u Sanjay Goyal, ki ophisar na ka tnad Transport bad ki bor ba dei khmih jong ka Airport Authority of India (AAI).
Shwa ban leit jurip u Bah Sniawbhalang Dhar u la shong jingïalang bad ki bor ba dei peit jong ka Airport Authority of India (AAI) ban ïa pyrkhat ha kaba ïadei bad ka jingthmu ban pynheh ïa kane ka kad liengsuiñ kaba don ha ka shnong Umroi.
Ha ka jingïakren bad ki lad pathai khubor, u Bah Sniawbhalang Dhar u la ïathuh ba ka jingthmu ka long ban pynheh ïa kane ka kad liengsuiñ bad ruh ban pyrshang ban pyntreikam noh da kaba pynher ïa ki liengsuiñ manla ka sngi kata baroh 24 kynta ha ka shi taiew.
U la pyntip ba ka jingpynheh ïa kane ka kad liengsuiñ ka Sorkar Jylla ka dang donkam pisa sa kumba T. 500 klur bad ïa kane yn dang hap ban ïakren bad ban pan jingïarap pisa na ka Sorkar Pdeng.
