Shillong, Jymmang, 23: Ka Iingbishar Meghalaya High Court ha ka sngi Palei ka la shong bishar ïa ka ujor ha kaba ïadei bad ka jingkynnoh ba ka don ka jingbym ryntih ha ka rta rungkam ha ka jingthungkam ha ka tnat Pulit.
Ha ka jingshong bishar, u Additional Avocate General ka Sorkar u T. Yangi ba la synran lang da ka Government Advocate ka Kong Z.E. Nongkynrih, ki la pyni ïa ki katto katne ki dulir, khamtam ha kaba ïadei bad Meghalaya Police Act, 2010, bad ïa ka Office Memorandum kaba la pynmih ha ka 01.05.2024, kaba la shim tang katto katne bynta na ka Office Memorandum ba la pynmih ha ka 03.02.2022, kaba kdew ïa ka rta rungkam.”
Ka Iingbishar ka la bthah ïa u AAG ban buh jingthoh halor kane da ka Affidavit, lashai.
Ka jingshong bishar kan sa long biang haduh ka 28 tarik mynta u bnai.
Ka kynhun ki samla ba la lamkhmat da ka nongtrei monsngewbha ka samla Barilang Pyngrope ki la ïakhun na ka bynta ban pynbeit ïa ka rta rungkam jong ka tnat Pulit bad ka Office Memorandum (OM) jong u snem 2022, kaba pynjlan ka rta rungkam na ka 27 snem sha ka 32 snem bad na ka bynta ki Schedule Tribe, naduh ka rta 32 haduh 37 snem ha ki kam bapher bapher ka Sorkar.
Hynrei, dang shen la pynmih ïa ka Advertisement da ka tnat Pulit ha ka 6 tarik Lber, da kaba pynrung ïa ki kyndon bapher bapher, kaba kdew ba ka rta rungkam kan long tang naduh 21 snem haduh 27 snem na ka bynta ka post Unarmed Branch (UB), Sub Inspectors bad 18 snem haduh 21 snem na ka bynta ka post UB Constable, bad sa san snem ka rta ba la pynjlan ïa ki nongthep kam ST/SC/OST.
Kane ka kynhun ka la leit ujor sha ka Ingbishar lyngba ka Writ Petition.
Ha ka taiew baladep, ka Iingbishar Meghalaya High Court ka la phah da ka notis sha ka Sorkar Jylla bad sha kawei kiwei ki tnat treikam ban jubab halor kane ka kam ba la kynnoh ba ki don ki jingryntih ha ka rta rungkam ba la buh na ka bynta ka jingthungkam ha ka tnat Pulit ka Jylla Meghalaya.
