Shillong, Jymmang 23: Ka Sorkar Jylla ka la bthah ba ka Tribe Certificate ka dei kaba donkam na ka bynta ki shnong kiba hap hapoh u pud u sam jong ka Khasi Hills Autonomous District Council (KHADC) ha kaba ïadei bad ka jingai ïa ka syrnot Scheduled Castes bad Scheduled Tribes ha Meghalaya.
Kane ka long katkum ka jingpynbeit ïa ka SI 7 jong ka Guidelines na ka bynta ka jingpdiang bad kyntait ïa ki aplikeshon ban ai ïa ka syrnot Scheduled Castes bad Scheduled Tribes ha ka jylla Meghalaya ba la pynmih lyngba ka Office Memorandum ha ka 19 tarik, Lber, 2014.
Haba pyntip halor kane ha ka sngi Palei, u Myntri ka tnat Social Welfare Bah Paul Lyngdoh u la ong, “kane ka long na ka bynta ki aplikehson ban ai ïa ka syrnot SC/ST ha ka jylla Meghalaya, ha kaba, nalor kata kaei kaba la pynrung ha ki kyndon na ka bynta ka jingpdiang bad ka jingkyntait ïa ki aplikeshon, ngi la pynrung sa kawei ka kyndon kaba ong: kawei na ki mat ba la buh yn kynthup ïa ka Number 4 (kane ka dei kaba la bynrap) Tribe Certificate na ki bor ba dei peit ïa ki jaka kiba hap hapoh ka KHADC ka dei kaba donkam.”
“Kane kam kynthup ïa baroh watla na kane ka Tribe Certificate ka dei ka dulir kaba shong aiñ ba la ai da ka KHADC. Namarkata, kino kino kiba pynrung kyrteng ïalade ne kiba kam ne kiba kwah ban pynrung kyrteng bad ban ïoh ïa ka syrnot ST ki dei ban da ïoh shwa ïa ka Tribe Certificate ba la ai da ka KHADC katkum ki kyndon,” u la bynrap.
Katkum ka jingpynbna ba la pynmih halor kane, mynta yn pule noh kum ‘7”.
Ki dulir ba la kdew hapoh katkum ki jingdonkam ban dei ban aiti ki long: (a) Caste Identity i. Caste Certificate jong u kpa/kmie bad ka jingpynshisha ba don jingïadei. (ii) Ka Kopi jong ka dulir khyndew barim kaba kdew ïa ka kyrteng jaidbynriew ha ka dulir. (iii) Kano kano ka dulir sorkar kaba pynshisha ka jaidbynriew. (iv) Ka Tribe Certificate na ki bor ba dei peit jong ki jaka ba hap hapoh ka Khasi Hills Autonomous District Council (KHADC) ki dei kiba donkam.”
