Shillong, Naiwieng, 30: Ka Meghalaya Upper Primary School Teachers Association (MUPSTA) kan sa kynjoh sha ka jingïaid lynti kaba 30 snem kynthih ha kaba ai jingshakri bad ban peit ïa ka bha ka miat jong ki nonghikai skul Upper Primary ka rilum Khasi-Jaiñtia bad Garo.
Kum ka jingrakhe ïa kane ka jingdap 30 snem, ka MUPSTA kan sa pynlong da ka lympungbah jong ki nonghikai skul Upper Primary ha ka shnong Mukhla, West Jaiñtia Hills District ha ka 5 tarik, Nohprah, 2023 ka ban sdang ha ka por 11:00 baje mynstep.
U President ka MUPSTA, Babu Kenneth Shadap ha ka jingïakren bad ki lad pathai khubor u la ïathuh ba u Myntri ka tnat Pule Puthi jong ka Sorkar u Rakkam A. Sangma un sa long u kongsan ha kane ka sngi ryngkat ka jingdonlang jong u Adviser jong ka tnat Pule Puthi u Bah Himalaya Muktan Shangpliang bad ki nonghikai jong ki skul Upper Primary na rilum Khasi-Jaiñtia bad na rilum Garo.
“Ngi khot bad wer ïa baroh ki nonghikai jong ki skul Upper Primary shynrang bad kynthei na rilum Khasi, Jaiñtia bad Garo ba kin ïashim bynta lang ha kane ka sngi,” la ong u Babu Shadap.
U la ong ruh ba hadien ba u la shimti ïa ka kam President jong ka MUPSTA naduh u snem 2001-2002 un sa shongthait noh hadien ka lympungbah bad un sa pynkhamti noh sha kiwei pat ki ban shimti thymmai ïa kane ka lyngkor.
“Namarba kan long ruh kum ka jingïakynduh kaba khatduh bad nga kum u President, nga ïawer ïa ki nonghikai ba kin wan khnang ha kane ka sngi ba ka MUPSTA kaba dei ka kynhun kaba la rejistar naduh u snem 1993 kan sa rakhe ïa ka jingdap 30 snem,” u la ong.
“Wat lada ngan shongthait noh, hynrei ngan dang ïarap ïa ka MUPSTA kum u Adviser,” u la bynrap.
Haba kylli, u Babu Shadap u la ong, “ha kine ki 30 snem ba la leit noh, kum ka seng kaba ngi lah ban leh ka long haba ki nonghikai ki ïakynduh ïa kino kino jingeh khamtam haba ki nonghikai ki shah wengkam khlem daw, ki don ki nonghikai kiba shah ot palat ka tulop jong ki. Haba ki wan sha ka seng, ngi shimkhia bha ban pynbeit ïa kine ki jingeh. Ngi ïaleh ban don ka jingïatreilang bad ki School Management Committee.”
“Haduh mynta ngim lah ban len ba ki skul Adhoc Upper Primary ki dei kiba la rim bha naduh u snem 1989-1990 bad kam shym la don ka jingkyntiew kyrdan sha ka Deficit System,” la ong u Babu Shadap.
U la ïathuh ruh ha kaba ïadei bad ki jingdawa ba dang sahteng, ka Sorkar Jylla ka la pynkhamti ha ka State Education Commisson (SEC) bad ka Seng ka shaniah beit ha ka Commission ban shim rai.
“Katkum ka jingïakren, ka State Education Commission kan pyrshang hi ban ai ïa ka hok katba lah. Nga sngewskhem ba ka jingtrei hok jong ka Commission bad lada ka Sorkar ka shim ïa ka jingai jingmut jong ka Commission yn sa lah ban weng ïa ka jingeh jong ki nonghikai bad ki nonghikai kim donkam shuh ban mih sha surok ban dawa ïa ka hok,” la bynrap u Babu Shadap.
