Shillong, Jymmang 28: Ka Sorkar Jylla ka la rai ban pynkhlaiñ ïa ka jingdon jong ki Village Defence Party (VDP) ban rat dyngkhong ïa ka jingjyllei jong u drok bad ki jingdih pynbuaid ha ka jylla Meghalaya.
Ïa kane ka rai la shim ha ka jingïalang kaba la pynïaid da u Myntri ka tnat Social Welfare u Bah Paul Lyngdoh ha ka sngi Baar ryngkat ka jingdonlang ki Ophisar na ka tnat Kam Pohing, Social Welfare bad bun tylli ki NGO kiba don bynta ban ïakhun pyrshah ïa u drok.
Ha ka jingïakren bad ki lad pathai khubor, u Bah Paul u la ong ba la pynlong ïa ka jingïalang ban bishar ïa ka jingïaid lynti jong ka Drug Reduction Elimination and Action Mission (DREAM), ki kam ba la leh bad ban peit kumno ban pyndap ïa ki jaka ba suda ha kaba ïakhun pyrshah ïa ka jingjyllei jong u drok.
Haba kylli kiei ki lad ki lynti ba la shim ban tem ïa kane ka jingeh, u Bah Paul u la ong, “kawei na ki jingïathir ka long halor ka jingpynthymmai bad ka jingpynkhlaiñ ïa ki Village Defence Party khamtam ban wad bniah ïa ki jaka ba jur bha ka jingjyllei ki nongdih drok kynthup ïa ka nongbah Shillong.”
“Kawei ka jingeh kaba pynsngewkhia bha ïa ngi ka dei ka jingdonkam ban pynlong ïa ki prokram ban pynshai paidbah. Ngin ym kwah ban ïohi ba ka DREAM kan shu long tang ka kam jong ka sorkar. Ka long kaba donkam ban pynduna bad ban rat dyngkhong ïa ka jingjyllei jong u drok bad ki jait jingdih pynbuaid, ngi donkam ban pynïaid ïa ka jingïatreilang jong ki shnong ki thaw,” u la ong.
U la pyntip ba ha ki ar tylli ki jingïalang bad ki Dorbar Shnong, ka la mih ka jingmynjur na kiba bun ba ki Shnong ki dei ban ïatreilang ban ithuh bad ban ïakhun pyrshah ïa ka jingjyllei jong u drok.
“Ha ka jingïakren mynta ka sngi, ngi la kham pynleit jingmut bad ngi la kham phaikhmat ha kaba ïadei bad ka jingdon jong ki VDP ha ka jylla Meghalaya baroh kawei,” u la ong.
U Myntri shuh shuh u la bynrap, “kawei na ki jingduna ïa mynta ka long ba ki Dorbar Shnong ki sngew ba kim shym la shah pynkupbor bad na ka bynta ki katto katne wat ban wad ne ban don bynta ha kaba shimti ïa uba shah kynnoh bad ban ujor pyrshah wat ha thanat ka long ka kam kaba eh na ka bynta jong ki. Kane ka dei kawei ka bynta. Ngi la pyrkhat ruh ba ka jingïatreilang na ki shnong lyngba ki VDP kan long ka kam kaba paka bad ngin pynthymmai ïa ka jingdon jong ki VDP ha kylleng ka jylla.”
Haba kdew katkum ka aiñ, u Myntri u la ong ba ka kamram bad ka jingtreikam jong ki VDP ka kynthup ïa ka jingïatreilang bad ki bor Pulit ban pynneh ïa ka shongsuk shongsaiñ, lada donkam ruh ban pahara ha ki shnong ki thaw na ka bynta ban khanglad ïa ki kam tuh kam thiem, ki kam runar ruser bad kiwei kiwei ki kam be-aiñ ban ïada ïa ki jingim briew bad ïa ki nongkynti bad ban khanglad shwa ban jia kino kino ki kam bymman.
“Namarkata, u drok u hap hapoh u pud treikam jong ki VDP,” u la ong bad bynrap ba ki VDP kin sa ïoh ïa ki jinghikai kiba bniah ban ïakhun pyrshah ïa ka jingjyllei jong u drok.
“Ngn sa khot shen ïa ka jingïalang jong ki dorbar shnong da kaba sdang shwa na nongbah Shillong,” la ong u Myntri.
Haba kylli, u Bah Paul u la ong, “kam long satia kaba dei ban kynnoh ba ka Sorkar kam shym la ai jingkyrshan, ngi la ai jingkyrshan palat 9 tylli ki Deaddiction Centre bad ki jingsumar ki la ïaid shakhmat bad ka nuksa kaba dang shen ka dei ka Mawlai ha kaba ki nongïalam shnong ki la wan shakhmat ban ïarap ïa ki nongdih drok hynrei baroh ki jingdonkam kum ka bam ka dih, ka shong ka sah, ka jingïasyllok la bei pisa da ka Sorkar lyngba ka tnat Social Welfare.
Ha kajuh ka por, katkum ka Meghalaya AIDS Control Society (MACS), ka la leh ïa ka jingwad bniah ha ki phra tylli ki district bad kumba 3100 ngut ki nongdih drok ki ngat ha u khñiang jingpang HIV/AIDS.
