Shillong, Jymmang, 28: U President jong ka Hynniewtrep Youths Council u Bah Roy Kupar Synrem ha ka sngi Baar u la leit hajir hakhmat ki Pulit jong ka Sadar Police Station hadien ba u la shah pynngat ha ki kyndon jong ka Meghalaya Maintenance of Public Order (MMP) bad ha ki kyndon jong ka Indian Penal Code (IPC) tang hapoh khyndiat kynta ba ki dkhot ka HYC ki la leit ban kyndang bad ban pynra ïa ki ïing sah beaiñ jong ki poiwir ha Lum Survey dang shen.
Wat hapdeng ka jingther jong u slap, la sakhi ba ki dkhot jong ka HYC ki la leit synran ia u Bah Synrem shwa ba un rung shapoh thanat ha kaba ki Pulit kim shym la shah satia ia ki dkhot ban rung shapoh ka phyllaw jong ka thanat hynre la bthah ia ki ban ap shabar ka phalor jong ka thanat.
Ha ka jingiakren bad ki lad pathai khubor, u Bah Synrem u la ong kum ki nongialam jong ka seng kiba trei na ka bynta ka bha ka miat jong ka jaidbynriew kin ngat beit ha ki jingshah pynngat kyndon hynrei watla katta kum ka seng kan ieng skhem ban trei bad ban shakri ia ki paidbah khamtam eh ha kaba iakhun thma pyrshah ia u drok.
Shuh shuh u la iathuh ba sa arngut ki nongialam jong ka seng ba kynthup ia u Vice President bad ia u General Secretary kin sa khot hajir ha ki Pulit ha ki khyndiat sngi ki ban sa wan.
