Shillong, Jymmang , 28: Ka jingwan lynshop jong ka eriong Remal kaba la sdang naduh ka 26 tarik mynta u bnai kaba la neh haduh ka 28 tarik mynta bnai ka la dkhat jubor ïa ka jingim jong uwei u briew ha ka shnong Sutnga Weilong, kaba hap hapoh ka Wapung C&RD Block, East Jaiñtia Hills District.
Ïa une uba la khladnoh la tip kyrteng kum u Bah Ohimonmi Nongtdu, 27 snem ka rta. U Bah Nongtdu u la khladnoh na ka jingtwa ka kynroh kaba la ban ïa ka iing ha ka dong Wailong, Sutnga kaba la jia ha ka por kumba 5:00 baje mynstep sngi Baar.
Kane ka iing kaba la julor na ka jingtwa ka kynroh ka dei jong ka Kong Rati Nongtdu.
Katkum kaiphod ba la pyllait da ka Executive Director jong ka Meghalaya State Disaster Management Authority (MSDMA) ha ka sngi Baar, la pyntip ba saw ngut ki briew ki la mynsaw na ka jingtwa ka khyndew harud ka surok Mawlai Bypass kaba hap hapoh ka Mawlai C&RD Block ha ka sngi Baar. Ki saw ngut kiba la mynsaw ki dei ki misteri kiba dang ïohthiah ha ka iiing sher dara ba la jia ka jingtwa ka khyndew. Ïa kine ki saw ngut la pynkit noh sha NEIGRIHMS Hospital na ka bynta ban ïoh ïa ka jingsumar. Katba uwei pat uba la mynsaw na ka jingtwa ka kynroh ha Bivar Road bad la pynkynriah noh sha Woodland Hospital ban ïoh jingsumar.
Ka kaiphod ka la pyntip ruh ba 1222 ngut ki briew ki la shah ktah na kane ka jingwan lynshop ka eriong ha ka jylla baroh kawei kata naduh ka 26 tarik haduh ka 28 tarik mynta u bnai bad 233 tylli ki ing ki la shah pynjulor, 79 tylli ki shnong ki la shah ktah na kane ka jingsyllad ka eriong bad 10 tylli ki jingtei ki la julor ba kynthup ïa saw tylli ki skul, ka surok PWD, ka surokbah National Highway-6 bad ar tylli ki mobile Tower.
La ïoh jingtip ruh ba ka don ka jingtwa khyndew ha ki bynta bapher bapher jong ka jylla. Ka jingtwa khyndew kaba jur ka la jia ha Sonapyrdi Tunnel bad ki nongtrei jong ka National Highway Authority of India (NHAI) ki la trei shitom ban pynkhuid ïa ka khyndew.
Ha West Garo Hills, ka eriong ka la syllad ïa ka shnong Rongkhon kaba hap ha Rongram Block. Ki dieng ki la khyllem bad ki nongtrei jong ki tnat PWD (R) bad ka tnat Forest ki la trei shitom ban pynkhuid ïa ka khyndew.
Ha South West Khasi Hills, ka eriong Remal kaba la lynshop ha ka 27 tarik mynta u bnai ha ka shnong Mawten kaba hap hapoh ka Mawkyrwat C&RD Block ka la pynjulor ïa kawei ka ing.
Ka eriong ka la lynshop ha ka Lah Sngi u Blei ha ka shnong Dombah kaba hap hapoh ka Mawthadraishan C&RD Block bad kawei ka ing ka la julor malu mala.
Ka kaiphod ka la pyntip ruh ba hynriew ngut ki briew ki la duh noh ïa ka ing ba la kem ding na ka jingshah pom ha ka leilieh bad shah lied ha ka eriong, khyllem ki dieng, dkut ki waïar elektrik ha ka shnong Rongrong Bolsongchok kaba hap hapoh ka East Garo Hills kaba la jia ha ka sngi Baar.
Ka nongbah Shillong ka la sakhi ïa ka jingther jong u lapbah uba jur naduh ka Lah Sngi u Blei kaba la pynshlei um ïa ki surok bad ka um ka la rung wat sha ki thliewiing jong ki briew.
Ha 4th Furlong u Tower Mobile Phone u la khyllem ha ka miet Lah Sngi u Blei bad pynjulor ruh ïa ka painkhana jong kawei ka ing.
Ka leit ka wan jong ki briew bad ki kali ka la ktah na ka daw ka jingshlei um ha ka step sngi Baar namarba ka surok ha Langkyrding-Nongmensong ka la shlei da ka um na ka daw ka jingtheh khyndew ha ka nala ba ju tuid ka um bad ka jingshlei um ka surok ha Mawlai Nongpdeng kat haduh ba ka um ka la rung haduh ka thliew iing jong ki briew.
