Shillong, Jylliew, 12 : Ha kiba bun ki jingdonkam, ka jylla jong ngi ka hap ban shaniah beit ia ki mar ki mata kiba wan nabar jylla la ka long ha u khaw , ki marbam bapher bapher bad wat ka doh ruh. Ia kane lah ban sakhi tang ha kine ki shisngi ar sngi ba la leit noh ba kumno ki briew jong ngi ki khih pisa lynga bym don dohkha namar ba ym shah ban wanrah nabar jylla ba ka don kata ka jinginjek dawai Formalin.
Ngi la ioh ban ia kren bad ka Director of Fisheries kaba bat ruh ha kajuh ka por kum ka Chief Executive Officer FFDA ka Kong A.L. Mawlong. Ha ka jingiakren bad ngi, ka la iathuh ba kane ka jylla ka donkam dohkha kumba 32,000 metric ton ha ka shisnem hynrei na jylla lajong ngi lah ban pynmih tang 19,373 metric ton tam kaba duna nangta hap ban shaniah nabar jylla.
Ka Kong Mawlong ka la iathuh ba ha u snem 2022-2023 ka jingwanrah dohkha nabar jylla ka long 15,067 metric ton tam. Ka District kaba lah ban pynmih bun tam ki dohkha na kane ka jylla ka dei tang ka Ampati kaba lah ban pynmih haduh 5,260 metric ton ha ka shisnem.
Ngi ju iohi ba ka sorkar ka pynshlur ia ki paidbah ba kin ri dohkha bad ka ai ruh ia ki skhim ba kin shna pung dohkha, haba ngi kylli bniah halor kane ka Kong Mawlong ka la iathuh ba ki don ki skhim jong ka sorkar jylla bad ki don ruh ki skhim jong ka sorkar pdeng.
Ia ka skhim ba ka sorkar jylla ka ai la ju tip kum ka Meghalaya State Aquaculture Mission bad ha kane ka skhim ka sorkar jylla ka ai 1,50,000 (shi lak san phew hajar tyngka) na bynta ka pung kaba heh 10 hajar square phut bad na kane ka shi lak shiteng, 60 % yn bei pisa ka sorkar jylla, 25% ki hap lut hi ki nongioh ia ka skhim bad 15% pat ki hap ban siew da ka ram bad ki hap ban pyndep hapoh ka san snem.
Ka skhim kaba wan na ka sorkar pdeng pat ka dei kaba la tip kum ka Pradhan Mantri Matsya Sampada Yojana , na kane ka scheme ki ai 1,24,000 (shi lak ar phew saw hajar tyngka) na ka bynta ka pung kaba heh 10 hajar square phut. Ha kane ka skhim, 60% ka pisa ka ai ka sorkar, 40% pat hap pynlut hi nalade.
.
