Shillong, Jylliew, 12: Ka ophis jong ka Food Commissioner ka Sorkar Jylla haduh mynta ka dang iai bteng ban leh test ia ki dohkha khnang ban lap la ka don ne em ka jinginjek da ka dawai Formalin khnang ba ka dohkha kan ym pyut.
Ha ka jingiakren bad ki lad pathai khubor ha ka 12 tarik u Jylliew, 2023, ka Deputy Commissioner jong ka East Khasi Hills District ka Kong R.M. Kurbah ka la iathuh ba ka jinginjek dawai Formalin ia ki dohkha kam shym la sdang na kane ka Jylla Meghalaya hynrei ka la sdang na kiwei pat ki jylla jong ka ri India.
Ka la iathuh ba ka jingkhang ban die ia ki dohkha ka la sdang shwa na ka jylla Assam bad hadien kata, hadien ba ki Ophisar jong ka tnat Food Safety ki la lap ia ka jinginjek dawai Formalin ha ki 30 tylli ki dohkha ba la shim nuksa la hap ban pynjari mar mar da ka kyndon kaba khang ban die ia ki dohkha haduh 15 sngi kynthih.
“Namarba ngi sngewthuh ba ka dei ka iap ka im jong ki nongbam, ngi la pynmih ia ka jingpynbna ha ka 8 tarik u Jylliew bad ngim shym la ap haduh ban da ioh ia ka kaiphod na ki 100 tylli ki dohkha ba la shim nuksa. Mar mar ngi la shim ia ki lad jingiada ban ym die shuh ia ki dohkha na ka bynta 15 sngi,” la ong ka Kong Kurbah.
“Ngi sngewthuh ba ki nongkhaii bad ki nongdie dohkha ki duh ia ka kamai kajih hynrei ki dei ban sngewthuh pat ia ka iap ka im, bad haduh mynta kam shym la don kano kano ka jingleh be-aiñ na ka liang jong ki ba kin die la ka die ia ki dohkha wat hadien ba la khang,” ka la ong. Haba kylli, ka Kong Kurbah ka la ong, “hadien ka 15 sngi, ngin sa leit sha Khliehiew ban peit biang bad lada ka don ka jinginjek dawai Formalin yn ym pat shah satia ban die ia ki dohkha.”
