Shillong, Iaiong, 25: Haduh 340 tylli ki kuli siat liengsuiñ bym pat pynbthei bad saw tylli ki synduk thep kuli ki Pulit ki la ioh ban kurup na kawei ka khlaw ha South Garo Hills ha ka step sngi Palei.
Ia kine ki kuli, la ioh kurup da ki Pulit jong ka Chokpot na ka jaka ba la tep hapoh khyndew hadien ba ki la ioh ia ka jingtip kaba bniah na ka tyllong jingtip kaba thikna ba ki don ki synduk thep kuli ba la buhrieh da ki suba lehnoh ha kawei ka jaka khlaw ha ka shnong Chibokgre kaba hap hapoh ka Chokpot Police Station, South Garo Hills District, la iathuh ki Pulit.
Mar mar, ki Pulit ba la lamkhmat da u Sub Divisional Police Officer ka Chokpot ryngkat ka jingsynran lang jong u Circle Inspector ka Sadar, u Officer incharge jong ka Chokpot, u Incharge ka BDDS bad lai ngut ki Pulit langrut ki la leit sha kane ka jaka ha ka por kumba 1:15 baje mynstep ban pynlong ia ka jingwad ia ki kuli suloi ba la buhrieh bad dei tad haduh ka por kumba 3:27 baje mynstep ki Pulit ki la lap ia kine ki kuli na ka khlaw Chikbokgre.
Ia kine ki kuli ba la kurup la rah noh sha thanat. Ka jingtohkit mynta ka dang iaid shakhmat.
