Shillong, Ïaïong, 25: Ki Pulit jong ka Lumdiengjri Traffic branch kum shi bynta ban tehlakam ia ki ar shaka kiba pynkheiñ ia ki kyndon jong ka Motor Vehicle Act, ha ka sngi Palei ki la pynlong biang ia ka jingtalasi ia ki thuk thuk ar shaka ha Rilbong Point.
Kane ka dei ka sien kaba lai ba ki Pulit ki la pynlong ia ka jingtalasi mynta ka taiew.
Ki Pulit ki la talasi naphang ia ki nongñiah thuk thuk ar shaka ki bym don laisen, ia ki thuk thuk kiba pyndait da ki Modified Silencer bad khamtam ia kito kiba shu pyndait da ki Number Plate ba la shna hi bad kiba pyndait da ki Number Plate kiba rit bha bad ia kiba la weng noh ia ka Number Plate HSRP.
Ka Shillong Traffic Police (STP) ka la ban jur ia ki nongniah ar shaka ba ki dei ban da phikir bha haba ñiah bad ba kim dei ban pynkheiñ ia ki kyndon jong ka Motor Vehicle Act, bad kim dei ban shu tur rakrak namarba ki surok ha nongbah Shillong ki long kiba khapngiah bha bad kiba dap da ki kali khamtam naduh ka por mynstep haduh ban da miet.
Shuh shuh ki Pulit ki la maham ba kin dang iai pynjur shuh shuh ia ka jingtalasi ia ki thuk thuk ar shaka manla ka por namar ka jingioh kongujor na ki paidbah ba ki don bun ki ar shaka kiba ju mlien ban pynher bad kiba ju tur rak rak hapdeng surok bad na kyndong kynshrot bad kane ka la buh jingma ia ka jingim jong ki nongiaid nongieng.
