Shillong, Nailar, 28: Ka kynhun ïalehkai Sub Junior jong ka jylla Meghalaya ba la mihkhmat da ka Nongjri Presbyterian Secondary School, ka la ïoh rah ïa ka nam lahduh ha ka kyrdan Sub-Junior Under-15 jong ki shynrang ha ka lympung ïalehkai 63rd Edition Subroto Cup International Football Tournament 2024 hadien ba ka la lah ban pynliem noh ïa ka Major Dhyanchand Sports College na ka jylla Uttar Pradesh da 3-0 kol ha ka jingïakhun phainal kaba la long ha ka sngi Balang ha ASC Centre Bengaluru.
Haba phai sha kane ka jingïakhun phainal, ka jingïalehkai naduh ba sdang jong ka kylla step kala long kaba itynnad bad tang mar ïasdang ka jingïakhun ka Nongjri Presbyterian Secondary School, ka la ïoh ban pynkhih ïa ka jar tang ha ka por 1 minit bad ha ka por 34 minit lyngba u Prosperwell Ryntong.
Watla ka kynhun ïalehkai Major Dhyanchand Sports College ka la pyrshang ban ïakhun dohïap hynrei kam shym la lah ban pynphai kylla namar ka jingtbit jong ki rangïalehkai ka Nongjri Presbyterian Secondary School.
Ynda la wan sa ka jingïakhun ha ka kylla miet ka jingïalehkai ka la nang kham shongshit hadien ba ka Nongjri Presbyterian Secondary School ka la ïoh pynkhih biang ïa ka jar ha ka por 48 minit lyngba u Namebanlam.
Da kane ka jingjop ka Nongjri Presbyterian Secondary School, ka la ïoh khur ïa ka khusnam da ka song pisa kaba 4 lak tyngka ryngkat ka trophy katba ka Major Dhyanchand Sports College kaba la wan baar ka la ïoh khur ïa ka khusnam da ka song pisa kaba 2 lak lem bad ka trophy.
