Shillong, Jymmang, 10: Ki dkhot ka Hynñiewtrep Youths Council (HYC) ba la lamkhmat da u President Bah Roy Kupar Synrem ha ka sngi Thohdieng ki la iohbat saw ngut ki kynthei bad 18 ngut ki shynrang bar jylla ba la kynnoh ba ki dei kiba ju mlien ban im kyrni ha ka jingdih ia u drok.
Ia kine ki 22 ngut, ki dkhot ka seng ki la ioh bat ha ka jingkhynra ha ka Parking Lot ka Meghalaya Urban Developement Authority (MUDA) ha Khyndai Lad, Shillong.
Nalor u drok ba la thep ha ki 32 tylli ki tyndong ba la ioh kurup na kine ki 25 ngut ki nongdih drok, ki dkhot ka HYC ki la ioh kurup ruh ia u Ganja, ki thyrnia Injek bad ka Dendrite.
Ki dkhot ka HYC ki la pynjulor ia u drok, ia u Ganja, ia ki thyrnia injek bad ia ka Dendrite da kaba shu thang da ka ding bad maham ia kine ki nongdih drok ba kim dei shuh ban dang mlien ban dih drok ha ki jaka paidbah.
U Vice President ka HYC Bah Donboklang Kharlyngdoh ha ka jingiakren bad ki lad pathai khubor u la iathuh ba uwei na pdeng ki 18 ngut ki shynrang u la phla ha ki dkhot ka seng ba u dei uba ju donkti ban pyniaid nuti ia ki kynthei ha Khyndai Lad.
“Ngi la maham ia une u khynnah bad ym tang ia ki nongdih drok ba ka imlang ka sahlang kam pat lah ban pdiang ia ki haduh mynta ba phin leh kum sha ki ri nongwei,” la iathuh u Bah Kharlyngdoh.
Haba kylli u la iathuh, ba u don uwei u nongdih drok uba ju lum lang ia ki nongdih drok ban leh ia kine ki jait kam. U la ong ruh ba ka seng ka la ioh ban kurup kham bun u drok na kawei ka kynthei bar jylla kaba la 24 snem ka rta bad iathuh ruh ba ka seng ka la iohbat ia ki nongdih drok naduh Keatinge Road ter ter bad na Parking Lot MUDA.
U la ong ruh ba ka seng hi kam don jingshaniah shuh ia ka tnat Pulit namarba katba ki nang kem, katta nang kharoi ki nongdih drok.
“Lada ngim kyndit bynriew kum ka imlang ka sahlang, ka nongbah Shillong hapoh 10 snem kan sa kylla kum ka Zombie City,” u la ong.
“Lada ki (Pulit) lah ban khylliap lama ia ki seng lehnoh balei ym lah ban pynduhjait noh shisyndon ia ki snar khaii drok ha Shillong. Ngi kum ka kynhun ngi hap ban sumar ioh don eiei sha lyndet. Ngi lap bad ngi sakhi wat ki briew jong ka ain ruh ki don kiba dih bad kiba pyndon kam ia u drok,” la kynthoh une u nongialam ka HYC.
“Ngi kwah ban kren da kaba shai ia ka Sorkar khamtam ia ka tnat Pulit, sngewbha wat leh kamkai namarba kum ka jaidbynriew ngi tieng thot thot,” u la ong.
U la iathuh ba ka jingbym aiti jong ka seng ia ki nongdih drok ba la iohbat sha ki bor Pulit ka long namarba tang shi miet armiet ki la lait na along katba kiba iohbat ia ki nongdih drok ki hap ban leit hajir hakhmat ka Kashari na ka sngi sha ka sngi.
“Lada ka Sorkar ka ieid ia ka pateng kaba mynta bad ka ban sa wan, snggewbha leh eiei. Ka Sorkar ka dei ban shimkhia ban don la ka jong ka Rehabilitation Camp namarba ki don napdeng kiba im kyrni ha u drok ki la kwah ban kylla,” u la ong.
U la iathuh ruh ba ka seng kan nang pynjur shuh shuh ia ka jingkhynra ban bat ia ki nongdih drok ha kylleng ka sor Shillong ha ki sngi ki ban dang wan.
