Shillong, Jymmang 10: Ka President jong ka ri India ka Droupadi Murmu ha ka sngi Palei ka la pynkup burom da ka khusnam Padma Shri ia ka Kong Silbi Passah ha ka liang ka Arts ha ka jingialang kaba long ha New Delhi.
Ka Kong Silbi Passah kaba dei ka nongshong shnong jong ka Riatsamthiah, Shillong, ka dei ruh ka nonghikai ha ka sobjek Hindi ba la shongthait, ka Resource Person jong ka Sarva Shiksha Abhiyan bad ka Directorate of Educational Research & Training bad kaba ai jingiarap ia ka SCERT bad ka DERT, ha kaba iadei bad ka jingai jinghikai ia ki nonghikai ha kiba bun ki liang.
La kha ia ka Kong Silbi Passah ha ka 3 tarik, Lber 1952 bad ka la pyndep ia ka Bachelor ha ka Hindi bad ka la shakri kum ka nonghikail Hindi ha Khasi Jaintia National Government Upper Primary School, Mawkhar Shillong ha u snem 1982. Ban kyntiew ia ka ktien Hindi ka ju iashim bynta ruh ha ki Radio Programme, halor ka phang “Hindi Lesson”, ba ju pathai da ka All India Radio Shillong. Ha u snem 2005, ka la trei hapoh ka Central Institute of Hindi (Agra) na ka bynta ban pynkhreh ia ka Hindi- Khasi Contrastive Grammar.
Ka Kong Silbi nalor ba ka long kaba ieid bha ia ki sur jingrwai tynrai, ka ju leit ban iashim bynta ha kiba bun ki prokram ba ju pynlong da ka tnat Arts and Culture kaba ju iatreilang bad ka North East Zone Cultural Centre ha kylleng ka ri India.
Nalor kata, ka dei ruh ka kynthei Khasi ba nyngkong eh ban thoh ia ka skit ha ka ktien hindi ia kaba la ai kyrteng ka “Hindi Bhasha Hamari Rashtra Bhasha Hai” ba la pyni paidbah ha ka Doordarshan Kendra Shillong. Dang shen ka la ialam ia kynhun ban iashim bynta ha ka jingshad tynrai ha ka “Adi Shaurya Parv Parakram ka”, 2023.
Kum ka jingithuh ia u synniang u bynhei ba ka la noh sha u sup u thiar jong ka imlang ka sahlang, ka Kong Silbi Passah ka la ioh pdiang ruh ia ka khusnam District Certificate of Honour na ka sorkar Jylla ha u snem 2001, na ka Seng Khasi, Seng Kmie Honorary Award ha u snem 2008; ka State Award ha u snem 2005; ka People’s Choice Award NETV ha u snem 2005; ka National Award for teachers ha u snem 2006; ka Jeebon Roy Award ha u snem 2008; ka Khasi Jaintia Welfare Award ha u snem 2009; ka International Gold Star Award ha Bangkok ha u snem 2010, ka Seng Samla Seng Kmie Honorary Award ha u snem 2011; ka Lady of Hope (Cape Town South Africa) ha u snem 2012; U Tirot Sing Award for Art and Literature Meghalaya ha u snem 2014; ka Youth Affair Award ha u snem 2019; ka 4th Northeast Unsung Heroes Red Carpet Social Award ha u snem 2021 bad ka Sangeet Natak Academic Award ha u snem 2021.
