Shillong, K’lyngkot, 22: Ki paitbah ha ryngkat ki Sengbhalang ka thaiñ Mawshynrut ha ka sngi Palei ki pdiang burom ïa u samla Bankerlang Myrthong ha Zero Point Riangdo hadien ba u la wanphai kum u nongjop ha ka jingïakhun ïa ka Traditional Wrestling ha ka 13th All India Traditional Wrestling & Pankration Federation National Championships 2025–26 kaba la long ha Nongbah Delhi.
Hadien ka jingpdiang burom la pynlong sa ka jingïaid rally ha Ïew Riangdo bad la pynkut ha Pomdkhar bad la bteng pat sa ka jingïalang ïa kaba la pynïaid da u Babu Lyngdoh Peiñlang uba long u nongïalam ka shnong ha ryngkat ka jingïadonlang ki bahaïing hasem, ki nongïalam ka HYC, HANM, MYM bad kiwei kiwei kiba la ai jingkren ha ka jingïalang.
U Bankerlang Myrthong u la ong ba u hap ban trei shitom ban ïoh khur 4 tylli ki takma bad 2 tylli ki trophy.
U la pynpaw ruh ba u la pynkhreh pat mynta ban leit ïakhun sha Vietnam na ka bynta ka mih khmat ïa ka Ri India.
