Shillong, Naitung, 07: Kum shi bynta ban lum jingtip bad ban wad bniah halor ka jinglong jingman jong ki paidbah nongshong shnong ha khappud khamtam ha ka thain Langpih ka Regional Committee na ka bynta ka West Khasi Hills ha ka sngi thohdieng ka la lum ia ka jingialang bad ki nongshong shnong jong ka thaiñ kaba la long hapoh Tyrsem Hall jong ka ophis u Deputy Commissioner ha Nongstoiñ, West Khasi Hills District.
Ha kane ka Committee ba la lamkhmat da u Bah Paul Lyngdoh kum u Chairman la donlang ruh ki dkhot jong ka Committee kiba kynthup ia ki MLA, kata, u Bah Renikton Tongkhar, u Remington G Momin, u MDC u Bah Bajop Pyngropre, ki ophisar, ki nongsynshar shnong bad ki Sengbhalang.
Ha ka jingiakren bad ki lad pathai khubor hadien ba la wai ka jingialang u Bah Paul u la iathuh katkum ka jingioh lum jingtip jong ka Committee lyngba kane ka jingialang, ki don haduh 41 tylli ki shnong Khasi bad ki shnong Garo kiba pynpaw ba ki kwah beit ban don hapoh ka jylla Meghalaya katba 9 tylli ki shnong ki dei kiba kwah ban leit sha Assam.
Shuh shuh u la ong ruh ba ka Committee shen kan sa pynlong ruh ia ka jingjurip lang bad ka Regional Committee na ka Jylla Assam khnang ban tip kham bniah ia ka jinglong jingman ha ki shnong khappud jong ka thain Langpih.
