Shillong, Naitung, 07: Ka Dr. Ampareen Lyngdoh kaba long ka MLA jong ka Laitumkhrah Constituency bad ka Myntri jong ka Sorkar Jylla ka la bthah ia ka tnat Pulit ba kan pynlong da ka jingtohkit kaba bniah halor ka jingjia ha ka miet sngi Palei kaba lam shaduh u pud ba ki kali ba la pynieng ha phyllaw jong ka Laitumkhrah Police Station ba kynthup ia kawei ka kali Gypsy jong ki Pulit kaba don ia u nombar ML02-0238 ka la shah wiang ding katba ka kali Tourist kaba don ia u nombar ML05 Y-9977 ka la shah pynjulor na ka jingshah kawang da ki maw bad kawei ka thuk thuk ar shaka kaba don ha kane kajuh ka jaka ka la julor malu mala.
Ban tip bniah ia kane ka jingjia, ka Dr. Ampareen Lyngdoh, ryngkat bad u MDC ka Laitumkhrah-Malki Constituency u Bah Joseph Fantin Lakadong ha ka sngi thohdieng ki la leit jurip ia ka Laitumkhrah Police Station bad shong jingialang ruh bad u Superintendent of Police ka East Khasi Hills u Bah Sylvester Nongtnger, u SP (City) Bah Vivek Syiem bad kiwei kiwei ki Pulit ophisar jong ka Laitumkhrah Police Station.
Ha ka jingiakren bad ki lad pathai khubor kane ka MLA jong ka Laitumkhrah ka la pynrem jur ia kane ka jingjia bad iathuh ruh ba ka la bthah ia ka tnat Pulit ban register case halor kane ka jingjia bad ban pynlong ia ka jingtohkit kaba bniah khnang ba ki briew kiba donkti ha kane ka kam ki dei ban ngat ha ki kynjri jong ka ain.
“Nga la ladep bthah ia ki Pulit ba kim dei ban shah kum ia kine ki jingjia. Haba la lap ba phi thang ia ki kali phi hap ban shim ia ka jingkitkhlieh. Ki Pulit ki dang pynkhreh ia ka kaiphod namarba u Symbud Myntri Rangbah uba peit ia ka tnat Kam Pohing u la bthah ia ki Pulit ban tehlakam ia ka jingjia bad pan ruh ia ka kaiphod khnang ban dup tip ia ka daw tynrai,” la bynrap shuh shuh ka Dr. Ampareen.
“Ka Laitumkhrah ka dei ka shnong kaba tip briew tip aiñ bad ngin ym shah ba kin leh kumne. Ngi la ong ia ki Pulit ba kin pynlong ia ka jingtohkit katkum ki lynti jong ka aiñ,” la ong ka Dr. Ampareen.
Ka la ong ruh ba katkum ka jingtip, ka jingiakajia ka la jia ha ka por mynmiet bad ka jingiakren ruh ka long hapdeng ka jingbym biang ka khlieh. “Ha ka jingshisha manla ki Police Station ki dei ban rah medical test (ia kiba iakajia) lada ka jia kumne. Ka jingiadih iabam ka long kaba sngewsih. Haba phi wan da u paidbhur ban iakren ha ka por mynmiet, kam don jingshai. Ngi dei ban peit ba kane ka kam ka dei ban kut noh hangne,” la bynrap ka Dr. Ampareen.
Shuh shuh ka la ong ba kum ka shnong Laitumkhrah kam kwah ba kiba nabar kin pyndik ia ka shongsuk shongsaiñ hapoh ka shnong.
