Shillong, Rymphang, 9: U Myntri Rangbah ka Jylla u Conrad K Sangma ha ka sngi Thohdieng u la ïathuh ba ka Sorkar Jylla ka ladep khot Tender na ka bynta ban shna ïa ka lynti ïaid kjat bad ïa ki nala ha Iewduh.
Ha ka jingïakren bad ki lad pathai khubor, u Sangma u la ai khublei ïa ka North Eastern Council (NEC) kaba la mang pisa T.10 klur ban shna pynbha ïa ki katto katne ki bynta ka Iewduh.
“Ngi sngewkmen ban pyntip ba ka Sorkar Jylla ka la pynsdang ïa ka kam bad ïa ka tender kaba T.5 klur ladep khot na ka bynta ban shna pynbna ïa ki nala bad ki lynti ïaid kjat ha Iewduh. Ka kam ka la ïaid bad ka NEC ka la mang pisa bad lada ka wan lyngba leilei kan ïarap shikatdei eh ïa ngi,” u la ong.
U la ong ba ka Sorkar kan sa ïoh ruh ïa ka pisa na ka Special Assistance on Capital Investment ban pynbhariew ïa ka Iewduh ba la rim tam ha kane ka jylla.
“Ïa ka phase-I ladep ban khot Tender. Ngi hap ban aiti noh ïa ka kam hapoh shitaiew ne shiphew sngi bad ngi kyrmen ba ki lynti ïaid kjat bad ka jingshna ïa ki nala kan sdang noh shen ha Iewduh. Ka pisa ba la ïarap da ka NEC, ngi sngewkmen haduh katta katta bad ngin pyndonkam bha ruh ïa ka,” la bynrap u Sangma.
