Shillong, Rymphang, 9: U Myntri Rangbah ka Jylla u Conrad K Sangma ha ka sngi Thohdieng u la takraiñ tyngeh ïa ka jingkynnoh jong ka VPP ba ka pisa ba la mang ban pyntreikam na ka bynta ki projek hapoh ka jylla ka dei ka pisa kaba shu shim da ka ram bad ha kajuh ka por u la kyntu ïa kino kino kiba wohdong ïa ka Sorkar ki dei ban wanrah ïa ki jingtip kiba bniah bad ban da kdew ruh ïa ki projek kiba dei.
U Sangma u la ong ba kam don kano kano ka jingleh bakla jong ka Sorkar haba shim ïa ka ram na ka bynta ki kam pynroi, namarba la bud ryntih ïa ki kyndon jong ka RBI bad jong ka Sorkar India.
“Ka long kaba bakla shikatdei eh, kaba da bakla shaba palat bad kaba shu mutdur, (ba ka pisa na ka bynta ki song pynroi ki dei kiba la shim da ka ram). Nga lah ban pynshai bin pa bin lada ka long kaba dei,” ong u Sangma ha ka jingïakren bad ki lad pathai khubor haba kylli halor ka jingkynnoh jong u President ka VPP Bah Ardent M. Basaïawmoit ba bun na ki kam pynroi ba la pyntreikam da ka pisa ba shu shim da ka ram.
Da kaba pynpaw ba un ym lah ban kynthoh khlem da tip thikna ïa kano ka projek ba ka VPP ka kdew, hynrei u Myntri Rangbah u la pynshai halor ka kyrdan jong ka Sorkar Jylla ha kaba ïadei bad ka jingshim ïa ka ram.
“Kam don kano kano ka jingbakla ïa kano kano ka sorkar ban shim ram na ka bynta ban leh ïa ki kam pynroi da kaba bud ïa ki kyndon jong ka RBI bad ka jong ka Sorkar India. Kam don kano kano ka jingbakla. Ïa ka pisa kaba mang ban pyntreikam na ka bynta ki kam pynroi, ki kyndon ki don hapoh ka jingtreikam jong ka sorkar bad hapoh ki kyndon jong ka Sorkar India,” la ong u Sangma.
“Haba phi sdang ban shim ïa ka ram na ka jingpynlut khajna, kata kan don ka jingeh. Hynrei kano kano ka jingkynshew pisa ka dei kaba ju leh kumba la leh na ka bynta ka Infrastructural Investment ka bym dei satia ka kam kaba sniew. Lada phi leit palat pud ïa kata, phin hap ban peit bniah. Hynrei sa shisien, ngam ïai ban ba lada ka dei hapoh ki kyndon ba la ai da ka Sorkar India, ngi lah ban shim (ïa ka ram),” la ong shuh shuh u Sangma.
U la ong ruh ba lada ka Sorkar kam shim ïa ka ram, ka Sorkar ka bakla shaba palat namarba kam shim kabu ïa ki kyndon ba la buh da ka Sorkar India.
Haba ai nuksa, u Myntri Rangbah u la ong, “lada ka Sorkar India ka ong ba phi lah ban shim ram T. 1000 klur, bad phi shim tang T. 500 klur, kata kan long ka bym dei namarba ngim shim ïa ka T. 500 klur ban pyndonkam na ka bynta ban kynshew. Kata ka dei ka jingthmu, bad kata ka dei kaba ka Sorkar ka ailad ïa ngi ban shim.”
U Myntri Rangbah u la ong ba ka Sorkar ka la ban shim ïa ka pisa na ka bynta ka jingmyntoi hapoh ki kyndon jong ka Sorkar Pdeng bad ka la pyntreikam ha kiba bun ki skhim bad ki jingmyntoi ba ki paidbah ka jylla ki la ïoh.
“Haoid, lah ban kynthoh, bad nga ju shim ba kito kiba wohdong ki dei ban wanrah ïa ki jingtip kiba bniah bad ngan da kmen shikatdei eh ban ai jubab,” la bynrap u Sangma.
Ha kaba ïadei bad ka Umïam Hydro Electric Dam, u Sangma u la ong ba ka Sorkar India ka la mang ïa ka pisa ba la ai sha baroh ki jylla bad ka Meghalaya ka la ïoh ïa ka mang tyngka kaba T. 400 klur na ka Sorkar India lyngba ka Ministry of Jal Shakti.
