Shillong, Jymmang, 04: Ka Jylla Meghalaya ka dei kaba wan baar ha ka ri India ha ka jingdon jong ki briew kiba ioh ïa ka jingpang bampong ne Cancer bad katkum ka jingwad bniah jong ka Indian Council of Medical Research (ICMR), ka jingdon jong ki briew kiba ioh pang bampong ha Meghalaya ka long, ki shynrang iwei na ki san ngut bad ki kynthei ka long iwei na ki khyndai.
Ïa kane la pyntip da ka Head of Department jong ka Oncology Department ka Civil Hospital Shillong ka Dr Anisha Mawlong ha ka jingïakren bad ki lad pathai khubor ha ka sngi Saitjaiñ.
Ka Dr. Mawlong ka la ïathuh, ha Naiwieng bad u Nohprah 2023, ka Oncology Department ka la pynlong ïa ka jingwad bniah ha ki 11 tylli ki District ka Jylla Meghalaya ban eksamin ïa ki paidbah khnang ban lap ïa kiba don ïa ka jingpang bampong.
“Na ki 11 tylli ki District, tang 1093 ngut kiba wan shakhmat ban shah eksamin bad napdeng kine la lap ba 15 ngut ki don ïa ka jingpang bampong bad 71 ngut ki dei kiba hap ban eksamin bniah ha Shillong Civil Hospital,” la ïathuh ka Dr. Mawlong.
“Hadien ba la eksamin bniah ïa ki 71 ngut ha Shillong Civil Hospital, la lap ba napdeng kine, 40 ngut ki don jingpang bampong bad lada kheiñ kyllum lang napdeng ki 1093 ngut kiba la wan phah eksamin paidbah (Screening), 55 ngut ki don jingpang bampong,” la ïathuh ka Dr. Mawlong.
Ka Dr. Mawlong ka la kyntu ïa ki paidbah ba kim dei ban sheptieng hynrei ban wan shakhmat ban phah eksamin, shisien ha ka lai snem khnang ban lap kloi ïa ka jingpang.
“Lada ngi lap kham kloi ïa ka jingpang ka jingsumar kan long kaba suk bad kito kiba don ka jingpang kin ioh ïa ka jingkoit ha ka por kaba biang,” la bynrap ka Dr. Mawlong.
Ka la ïathuh ba ka Jylla Meghalaya ka dei kaba wan baar hapoh ka ri India ha ka jingdon jong kiba iohpang bampong bad pyntip shuh shuh ba ka Meghalaya ka wan banyngkong ha ka ri India ha kaba ïadei bad ka jingdon jong ki briew kiba ioh pang bampong na ka jingkyrni ban dih bad ban bam duma.
“Katkum ka kaiphod jong ka ICMR ngi tip ba ka Meghalaya ka wan baar napdeng ki Jylla hapoh ka Ri ha ka jingbun kiba ioh pang bampong ha kaba ki shynrang ka long 227.9 ngut na ki 1 lak ngut ki nongshong shnong bad ki kynthei 118.6 ngut na ki 1 lak ngut ki nongshong shnong,” la ong ka Dr Anisha bad bynrap ba ka Meghalaya ka la wan banyngkong napdeng kiba iohpang bampong na ryndang.
Ka Dr. Mawlong ka la ïathuh ba ka jingpang bampong ka la sar ym tang ha ki jaka sor hynrei ka la pur ruh wat sha ki shnong nongkyndong jong ka Jylla bad ïathuh ruh ba ka jingpang Hypertension bad Diabetes ki dei ki jingpang kiba pynïap briew jarjar nalor ba ka jingpang bampong ruh ka dei ka jingpang kaba pynïap jar jar ïa ki nongshong shnong ha kane ka jylla.
Ïa mynta ka Jylla Meghalaya ka don ar tylli ki jaka sumar ïa ki briew kiba ioh ïa ka jingpang bampong ba kynthup ïa ka Shillong Civil Hospital bad ka North Eastern Indira Gandhi Regional Institute of Health and Medical Sciences (NEIGRIHMS), Hospital.
Katkum ka jingathuh jong ka Dr. Mawlong, ka Cancer Wing ha Civil Hospital, Shillong kaba don 90 tylli ki jingthiah shen kan sa ioh ïa ka Machine Linear Accelerator bad ka Bracket Therapy ban sumar ïa ki briew kiba ioh ïa ka jingpang bampong.
Ka la ïathuh, nalor ki tiar sumar ïa ka jingpang, ka Sorkar Jylla ka la pyntreikam da ka Meghalaya Cancer Prevention and Early Detection Mission bad lyngba kane ka mishon la ju pynlong ïa ki jingleh eksamin ïa ki paidbah ha ki bynta bapher bapher ka jylla ban lap bad ban sumar biang por ïa ki nongpang ba la ithuh ba ki don ïa ka jingpang bampong.
