Shillong, Jymmang, 04: Arngut ki briew kiba la shah kynnoh ba ki dei kiba ki donkti ha kaba thmu ban leh be-ijot ïa kawei ka samla kynthei kaba la don kumba 18 snem ka rta ha kawei ka shnong kaba don ha ka thaiñ Nongthliew, kaba hap hapoh ka Eastern West Khasi Hills District, ha ka sngi Thohdieng ki la khladnoh tang hadien khyndiat kynta ba ki la shah bom shnong haduh ban da jem jai ha ki paidbah nongshong shnong.
Uwei napdeng kine ki arngut, u la khladnoh ha Tirot Sing Memorial Civil Hospital, Mairang katba uwei pat u la khladnoh ha Civil Hospital, Shillong.
Kum ban shu pyntip, kane ka jingshah bom shnong jong kine ki arngut ka la jia ha ka por kumba 12:00 baje mynsngi.
Hadien ba la rah ïa ki sha Ingdorbar Hall, hynrei ki paidbah ki la pynpait wat ïa ka jingkhang nar bad tangon ïa ki arngut ki suba haduh ba kin da jem jai bad thiah lyngktop ha madan.
Ki bor Pulit kiba la wan poi biang por, kim shym la lah satia ban ai jingïada ïa ki arngut ki suba namarba ka jingbun shaba palat jong ki paidbhur.
Wat haba ki bahaing hasem jong kine ki arngut ki la kren da kaba jaijai ïa ki paidbah hynrei ym don satia mano mano ruh ban sngew ban sngap ïa ka jingkyrpad jong ki.
Ka samla kaba la ngat ha kane ka apot ka la phla ba ki arngut ki runar ki la rung jubor hapoh ing bad pynap ïa ka da ka wait na ryndang da ka jingthmu ba sniew ban leh beijot ïa ka.
Ha ka jingïakren bad u nonglum khubor, kane ka samla ka la ïathuh ba uwei na kine ki runar u la rung jubor hapoh ka kamra thiah jong ka, katba uwei pat u la ap siar ha kamra shongkai ioh don ba wan briew ha ka por ba ki dang leh ïa kane ka kam runar.
Kane ka samla ka la ïathuh hadien ba ka la kyndit bynriew ha ka jingïapler ka la pyrta jingïarap bad dei ha kata ka por ba ki arngut ki runar kiba la la lait phet napoh ïing ki la ngat pynban ha ka kti jong ki paidbhur.
Ka la ïathuh ruh ba ka la ithuh ïa ka dur jong uwei uba pynap ïa ka da ka wait na ryndang lyngba ka jaiñ kup kaba u la kah ïa ka durkhmat ha ka por uba la thombor ïa ka hadien ba la ïalam ïa ka sha ingdorbar Hall ban pynshisha ïa ki arngut ki runar.
Ki Pulit ki la register case halor kane ka jingjia bad ka jingtohkit mynta ka la ïaid shakhmat.
