Tura, K’lyngkot, 19: Ha ka jingiakop siatkhnam (Archery) ki jingialehkai ki la jam sha ka kylla iakhun phainal ha ka Meghalaya Games ha kaba baroh ki jingiakhun na ka bynta ban iaknieh ia ka nam lahduh yn pynlong ha ka sngi Saitjain ha madan ialehkai jong ka Montfort Centre of Education School, Tura.
Ki kynhun kiba la jam sha ka phainal ha ka Indian Round jong ki kynthei ne Women Team Event ki long ka West Khasi Hills District bad ka East Khasi Hills District. Katba ha ka jingialehkai kynhun jong ki shynrang ne Men Team Event ki long ka East Khasi Hills District bad ka South West Khasi Hills District.
Ha ka Mixed Team jong ka Revurve ki long ka South West Khasi Hills District bad ka West Jaintia Hills. Katba ha ka Indian Round (Mixed Team) ki long ka East Khasi Hills District bad ka Eastern West Khasi Hills District.
Ia ka takma rnong ha ka Women Team Event kaba la long ha ka sngi Thohdieng, la ioh khur da ka Ri Bhoi hadien ba ka la jop ia ka South Garo Hills District. Ka West Jaintia Hills District ka la ioh khur ia ka takma rnong ha ka Men Team Event hadien ba ka la jop ia ka West Khasi Hills District.
Ka Ri Bhoi ka la khur ruh ia ka takma rnong ha ka Mixed Team Event hadien ba ka la jop ia ka Eastern West Khasi Hills District. Ha ka Indian Round Mixed Team, ka West Khasi Hills District ka la khur ia ka takma rnong hadien ba ka la jop ia ka Ri Bhoi District.
