Shillong, Jymmang, 14: U Myntri ka tnat Social Welfare Bah Paul Lyngdoh u la kdew ba ka long kaba donkam ban khanglad bad ban pynsangeh ha ki Entry Point ïa ka jingwanrung jong u drok bad kiwei kiwei ki jingdih pynbuaid sha ka Jylla Meghalaya.
“Nga la pynsngew ïa kane ha u Symbud Myntri Rangbah uba peit ïa ka tnat Kam Pohing ba ngi donkam ban pynkhlaiñ ïa ki bor pahara ha ki Entry Point. 70% na ki jingdih pynbuaid kiba rung sha Meghalaya u wan lyngba ka East Jaiñtia Hills District bad dei ban pynkhlaiñ ïa ka jingpeitngor ha kane ka district,” ong u Bah Paul ha ka jingïakren bad ki lad pathai khubor ha ka sngi Baar.
“Hynrei kata kan urlong ynda la pyndep ïa ka jingthungkam ha ka tnat Pulit kumba 3000 ngut kin sa rung kam ha ka tnat Pulit bad 500 ngut ki Volunteer ha ka tnat Home Guard. Dei tang kane ka lad kaba ngi lah ban khanglad ïa ka jingwan rung jong u drok,” u la ong.
Katkum ka jingong jong u, ka Meghalaya ka dei kaba duna tam ha ka jingdon jong ki bor Pulit ha ka ri baroh kawei.
Haba pynpaw ba ka Sorkar ka ladep pynbna thma ban ïakhun pyrshah ïa u drok, u Bah Paul u la ong, ha ka jingshisha ki don bun ki jingïohkem, bun tylli ki case ba la sei madan bad bun ki nongpynkheiñ aiñ ki la shah pyngngat kyndon kaba pyni ba ka Sorkar ka la leh shisha ïa ka kamram bad nalor kata bun tylli ki lad ki lynti kiba ka Sorkar ruh ka ladep pynbna
“Dang shen, bun kiei kiei kiba la jia ki dei kiba buhrieh, hynrei la lah ban sei madan da ka jingtreikam jong ki Puit bad da ka jingïohkem ïa ki nongpynkheiñ aiñ ba la pynngat hapoh ka PITNDPS Act, 1988, ha kaba ki case mynta ki dang don ha ka lynti ban shim rai bad ban phah ruh sha ka Advisory Board, ka ban sa shong shen tang shu weng ïa ka Model Code of Conduct (MCC). Kane ka pynshisha ba la lah ban ïakhun pyrshah ïa ki nongpynkheiñ aiñ lada ki dei ki briew kiba donkti ban shalan lane lane lada dei ïa ki briew kiba ju dih ïa ki jingdih pynbuaid,” u la ong.
“Ka thup kyrteng ba la mynjur bad ba la phah sha ka Advisory Board phin sa ïoh ïa ki briew ki ban sa shah pynngat ha ki kyndon aiñ namar ka jingkhaii beaiñ ïa ki jingdih pynbuaid bad kane kan ïarap shikatdei eh ïa ngi ban ïakhun pyrshah ïa ka jingisaitmet jong u drok,” u la bynrap.
Haba u Bah Paul u la ong, “lada phi kynmaw ïa ka PITNDPS la wanrah ha u snem ba ladep. Ki Case ïa ki nongpynkheiñ aiñ bunsien ladep pynngat bad kine ki briew ngin pynthikna ba kin ngat ha ki kyndon jong kane aiñ.
U la ïathuh shuh shuh ba ka tnat ka la tyrwa ruh ban thung ïa u Mission Director ba thymmai jong ka DREAM project namarba u Director ba mynta u bunkam palat ha ka tnat Kam Pohing.
Shuh shuh u la ïathuh ba ka tnat Social Welfare marwei kam lah satia ban treikam bad ban pynduna ïa ka jingjyllei ki nongdih drok hynrei kane ka donkam ïa ka jingïatreilang na ka tnat Pulit, ïa ki kynhun treikam ka Sorkar bad ïa ka imlang ka sahlang khamtam eh na ki nongïalam Niam bad na ki Dorbar Shnong.
“Ka jingeh mynta ka long ba ngim pat ïoh jaka ban buh ïa ki Centre, bad ka jingpynssngewthuh paidbah ka dang ïaid shakhmat,” u la bynrap.
Haba kylli, hato ka shonghok neem ïa ki kynhun seng ban bat ïa ki nongdih drok, u Myntri u laong, donkam ban ïoh ïa ka jingïatreilang na ka imlang ka sahlang bad ïa ki dorbar shnong la kyrpad ba kin trei la ka jong ka kam da kaba buh ïa ki Deaddiction bad ki Rehabilitation Centre ha ki shnong ki thaw.
“Ngi la khot ïa ka jingïatreilang jong ki shnong ki thaw. Ngi ladep pynbna thma pyrshah ïa u drok bad ngi kyrpad ïa ki dorbar shnong ban ai jaka na ka bynta ban buh ïa ki Deaddiction bad ki Rehabilitation Centre namarba ka Centre kaba mynta la shna ha Mawlai,”la ong u Bah Paul.
Ha kaba ïadei bad ka jingduna pisa, u Bah Paul u la ong, “kane ka dei na ka daw ba la pynbna ïa ka elekshon Lok Sabha bad ka jingbym don ka Sorkar ba pura ha Delhi. Tang shu wan ka Sorkar thymmai kaba shimti ha Delhi, ngin sa ïakren bad ka Union Home Ministry.”
