Shillong, Jymmang 12: Ki paidbah nongshong shnong jong ka shnong Mynriang, kaba hap hapoh ka Mawryngkneng C&RD Block, East Khasi Hills District kaba don markhap ka Ri Bhoi District bad ka West Jaiñtia Hills District ki la pynpaw ïa ka jingsngew diaw halor ka jingduhnoh ka jingkieng doi doi ha Wah Umtung kaba dei ruh kawei na ki jingkieng kaba la rim bha.
Kane ka jingkieng doidoi ha Wah Umtung ka dei kaba pynïasoh ïa ka lynti ïaid sha Ri Bhoi District kum sha ka shnong Thadrang, Khyndewso, Mawlansnai bad Bhoirymbong bad kane ka jingkieng ka dei kaba ki paidbah nong shong shnong ki ju pyndonkam khamtam ha kaba leit iew leit hat kum sha iew Mawlasnai bad ban leit rep leit riang namarba bun kiba don ki jaka rep kum ki pynthor kba bad kiwei kiwei ki jaka rep.
Ka jingduh noh ïa kane ka jingkieng ïaid kjat ka la buh jingeh bha ïa ki paitbah kiba ju pyndonkam ïa kane ka jingkieng bad nalor kata ka buh jingma ruh ban ïaid lyngba khamtam ha ka por lyiur ha kaba ki nongïaid lynti ki hap ban shu snoh ha ki sainar.
Ka jingpyndonkam ïa kane ka jingkieng ka long ba ki paidbah ka shnong Mynriang kim don lynti ïaid da kawei pat watla ka don ka surok napoh ka wah Umtung kaba la pyntrei da ka skhim Mahatmat Gandhi National Employment Guarantee Scheme (MGNREGS) hynrei ïa kane ka surok ki paidbah ki ïohlad ban pyndonkam tang ha ka por tlang barit ka um.
“Ïa mynta leilei kane ka jingkieng kam long shuh ban ïaid namarba la la duh lut satang ki nar ba sah khongreng,” ong u Secretary Shnong jong ka shnong Mynriang u Bah JJ Lyngkhoi da kaba kyntu ïa ki bor Sorkar ba kin ïarap lem ban maramot noh ïa kane ka jingkieng khnang ba kan pynsuk ïa ki paidbah ha ka leit ka wan.
“Kum ka shnong baroh shikatta ngi la sumar bha ïa kane ka jingkieng, ngi la maramot ruh manla ka por hynrei namarba ka jingjulor ka la long shaba palat kumta kum ka shnong ngim ïohlad shuh ban sumar. Kum ka shnong ngi ka buh bun tylli ki jingthoh ha ka Sorkar bad ha ki bor ba dei peit ba kin thaw ïa ki lad ki lynti ban pynïoh skhim na ka bynta ban maramot ïa kane ka jingkieng hynrei haduh mynta ngim pat ïoh jubab eiei,”la ong u Bah Lyngkhoi.
“Ngi la buh jingthoh ruh sha ka Khasi Hills Autonomous District Council ba kan ïarap ban wadlad ban pynrung ïa ka skhim khnang ban pynbha ïa kane ka jing kieng. Ka jingïarap ba khaduh ba ngi la ïoh ban maramot ïa kane ka jingkieng ka dei ha u snem 2021-2014 lyngba u MLA barim ka Mawryngkneng Constituency u Bah David A Nongrum ha ka jinglut kaba kot T.50.000 hajar lait nangta ngim ïoh shuh ïa kino kino ki jingïarap,” la ïathuh u Secretary ka shnong Mynriang.
Katkum ki dak ki shin, kane ka jingkieng mynta ka shu sah sa tang ka shynrong.
“Kum ki nongshong shnong ka shnong Mynriang ngi kwah ba kane ka jingkieng kan ieng biang sa shisien hynrei ngim kotbor shuh namarba ka jinglut kam dei shu long tang ba malu mala,” ong u Bah Lyngkhoi bad bynrap, “ngi kyrpad ïa ka Sorkar ba kan thawlad ban ïarap lem ïa ka shnong Mynriang bad ngi kyntu ïa ki nongmihkhmat ba kin peit lem ïa ngi ba ngin lah ban maramot ïa kane ka jingkieng namarba ngi kwah ban pynneh pynsah ïa kane ka jingkieng ban pynneh pynsah ïa ki matti jong ki menbarim bad ym ban shu sah sa tang ha ki jingïathuh khana.”
