Shillong, Risaw, 13: Ki paidbah nongrep kiba shong basah ha ka thain Block II, haduh mynta ki dang mad ia ka jingeh na ka daw ka jingpynieng khyrdop khrong khajna da ka Karbi Anglong Autonomous Council (KAAC) da kaba oh khajna T. 7 hajar bad 8 hajar tyngka na ki marrep ba kynthup ia u Synsar bad u Sying.
Ia kane la pyntip da u President jong ka Synjuk ki Rangbah Shnong Border Area Raid Nongtung, u Bah Blik Sohtun ha ka jingiakynduh ia u Chief Executive Member (CEM) jong ka Khasi Hills Autonomous District Council (KHADC) u Bah Pyniaid Sing Syiem ha ka sngi Thohdieng.
Katkum ka jingiathuh jong u Bah Sohtun, ka Karbi Anglong Autonomous Council (KAAC) ka la pynieng kumba 5 tylli eiei ki khyrdop khrong khajna, kata, ha ka shnong Jatalong, Sabuda, Umjaknieh, Madan Umwang bad ha ka shnong Mawsladieng.
U Bah Blik Sohtun u la iathuh ba ka Synjuk ka ladep ban pynsngew ia kane ka jingeh sha ka District Council bad na ka liang jong u Bah Pyniaid marmar u la telephone ia u Chief Executive Member jong ka Karbi Anglong Autonomous Council (KAAC) halor ka jingdon jong kine ki khyrdop khrong khajna bad na ka liang jong ka Synjuk mynta ki la shanniah beit ha ka KHADC ban leh eiei halor kane.
U MLA jong ka Mawhati Constituency u Bah Charles Marngar uba long ruh ha kajuh ka por u MDC u la iathuh ba kum u nongmihkhmat ba ki paidbah ki la phah ia u sha Khasi Hills Autonomous District Council (KHADC) u ladep pynpaw ia ka jingsngewhun namar ba ha ka thain Block-II kam ju don shuh ka jingshah pynthut jong ki paidbah Khasi bad halor ka jingpynieng ia ki khyrdop khrong khajna da ka KAAC, na ka liang jong u Bah Charles u la iathuh ba u ladep ban pynsngew ia kane hapoh ka Ingdorbar Thawain jong ka Jylla.
