Shillong, Risaw 13: Ka Myntri jong ka tnat ka Koit ka Khiah ka Sorkar Jylla ka Dr. Ampareen Lyngdoh ka la kyntu ia ki paidbah nongshong shnong jong ka jylla ba ki dei ban kitkhia hi dalade ialade ban leit phah leh Test ha ki jaka sumar kiba don hajan kum ki PHC, CHC, lada ki don ia kano kano ki jingpang khie shit ha ka met namar ba ha kine ki khyndiat taiew mynta u bnai ka tnat ka Koit ka Khiah ka la lap ba ha ki bynta rithor jong ka rilum Garo ka jingpang khie shit ne ka Dengue ka jur bha.
Ha ka jingiakren bad ki lad pathai khubor, ka Dr. Ampareen ka la iathuh ba naduh ka 3 tarik haduh ka 12 tarik mynta u bnai ka tnat ka Koit ka Khiah hadien ba la leh Test ia ki 25 ngut ki nongpang kiba ioh ia ka jingpang khie shit, la lap ba ki don 6 ngut kiba long Positive. Nangta, ha ka jingleh test ha ka 4 tarik mynta u bnai ia ki 22 ngut ki briew, la lap ba na kine, ki don sa 9 ngut kiba long Positive.
Ka Myntri ka la iathuh ruh ba ka jingpang Dengue ka la dkhat noh ia kawei ka mynsiem briew ha rilum Garo ha kine ki khyndiat sngi hadien ka jingai jingsumar ha Tura Civil Hospital.
“Hadien ba ngi la leh Test, ka pynpaw ba ka jingioh ia ka jingpang Dengue ka la hiar na ka 9 tarik bad haduh hynnin ka sngi Palei ki don sa tang 2 tylli ki Case. Ki paidbah kim dei ban sngewthuh bakla ba kane ka dei ka jingpang COVID. Ka jingpang Dengue ka dei na ka jingdait skaiñ. Namarkata, ki paidbah ki dei ban phikir bha ban pynkhuid ia ki sawdong sawkun jong ka iing ka sem khnang ban pynduna ia ka jingkharoi jong ki skaiñ bad ki pyrjong,” la ong ka Dr. Ampareen.
“Lada ioh jingpang shit ka bym hiar, kan bha (ia ki nongpang) ban leit marmar sha ka Testing Facility kiba don ha ki PHC, CHC namar ba ngi la pynbna paidbah ia ki Standard Operating Procedures (SOP) ne ki kyndon ba ki (nongpang) hap shim lada ki ioh ia ka jingshit kaba kham kiew,” ka la ong.
“Kine ki case ki la kham hiar ha rithor sawdong jong ka jylla jong ngi. Hynrei lada ki paidbah ki ioh ia ka jingpang khie sht ka bym hiar kan bha ban ki leit marmar sha ki Hospital kiba don hajan ban phah leh Test mardor khnang ban iada ialade,” la kyntu ka Myntri ka Koit ka Khiah ia ki paidbah.
“Ngi la iakren ia ki Block Development Officer (BDO) ba ki dei ban shimkhia ia kane ka kam bad ban peit ba u khñiang jingpang Dengue un ym pur ha kane ka jylla,” la iathuh ka Dr. Ampareen.
Haba kylli, ka Dr. Ampareen, ka la iathuh ba ha East Khasi Hills District ka jingpang Dengue kam pat ktah satia.
Lada ka jingshit kam hiar, hap ban retest biang. Kane kam don jingiadei eiei bad ka jingpang covid.
Sha ki bynta Rithor jong ka rilum Garo, ka jingpang Dengue ka la kiew bha.
Katkum ka jingiathuh jong ka Myntri ka Koit ka Khiah, haduh mynta ki don 139 ngut kiba ladep leh Test bad na kine, tang 44 kiba long positive. Ha ka jingleh test hynin ka sngi Palei ia ki 7 ngut, sa tang ar kiba long Positive.
