Shillong, Risaw, 13: U Chief Executive Member (CEM) jong ka Khasi Hills Autonomous District Council (KHADC) u Bah Pyniaid Sing Syiem u la byrthen ba ka Executive Committee jong u kam salia ban hiar shimiet shimiet sha Block-II lada ki paid Khasi kiba sah ha kane ka thaiñ kin dang iai mad ia ki jingshah pyndik ba harrukom ha ka Sorkar Assam.
Ka shongsuk shongsaiñ ka la sdang ban wan phai biang ha ka thain Block II hadien ka jingiakynduh hapdeng ki nongmihkhmat na ka Karbi Anglong Autonomous Council bad ka Khasi Hills Autonomous District Council dang shen ha nongbah Shillong ha u bnai Nailur mynta u snem.
U Bah Pyniaid Sing Syiem ha ka jingiakren bad ki lad pathai khubor u la ong, ‘lada ki dang don kiba pynwit ia ki Khasi kiba sah ha kane ka thain na ka liang jong ka Executive Committee kam salia ban hiar shiteng miet sha Block II.”
Kane ka jingbyrngem jong u Bah Pyniaid ka long hadien ba ka Synjuk ki Rangbah Shnong Border Area (SRSBA), Raid Nongtung ki la iakynduh ia u Bah Pyniaid na ka bynta ban ai khublei hadien ba ka thain Block-II ka la mad biang sa shisien ia ka shongsuk shongsain khlem da don shuh ka jingshah pyndik.
