Shillong, Naiwieng 02: U Myntri Rangbahduh ka ri India u Narendra Modi bad ka Myntri Rangbahduh jong ka ri Bangladesh, ka Sheikh Hasina ha ka sngi balang ki la plie paidbah ïa ka lynti rel Akhaura-Agartala.
U Secretary jong ka North Eastern Council (NEC) u K Moses Chalai u la ong, na kane ka projek lynti rel kaba 12 kilomitar, 5.45 kilomitar kaba hap ha ka bynta jong ka ri India ka dei kaba la bei tyngka da ka tnat DoNER bad ka NEC kaba kot T. 863 klur. Ka jingmang pisa baroh na ka bynta ka projek kaba 12 kilomitar ka long T. 973 klur ha u bnai Naitung, 2016. Ka NEC ka ladep pyllait T. 798.73 klur.
U la ai jingkren sha ka kynhun jong ki 13 ngut ki nongthoh khubor na ka Jylla Maharashtra kiba la ïakynduh kyrpang ïa u ha ka kamra treikam ha NEC.
Kane ka kynhun ka la ïashim bynta ha ka jingleit peit bniah ba la pynlong da ka Press Information Bureau hapoh ka skhim ba la bei tyngka da ka Sorkar Pdeng kaba la tip kum ka Development Communication and Information Dissemination.
Kane ka dei da ka jingthmu ban pyni ïa ki kam pynroi bapher bapher ba la sdang ha jylla Meghalaya, ka bynta jong ki kynhun bapher bapher jong ka Sorkar India ban ai jingkyrshan na ka bynta ka jingshngain bad ka roi ka par bad pyni ïa ka jingriewspah ka deiriti jong ka jylla.
Haba ïakren bad ki nongthoh khubor, u Secretary u la ong ba ka North Eastern Council (NEC) kaba long ka Nodal Agency na ka bynta ka jingkyntiew ïa ka ïoh ka kot bad ka imlang sahlang jong ka thain Shatei Lammihngi ka la long kaba kongsan ha ki kam jong ka.
Ki jingjop ha ki 50 snem ba la leit hadien ba la sdang ïa ka ha u snem 1972, ki la long kiba khraw ha ka liang ka jingkyntiew ïa ki jingdon jingem, ka pule puthi, ka koit ka khiah bad ki kam rep.
Namarba ka long ka kynhun kaba pynkhreh kam na ka bynta ka thaiñ Shatei Lammihngi, ka NEC ka la plie ïa ka North East Resource Centre (NERCEN) da ki jingthmu ban kyntiew ïa ka jingpyndonkam ïa ka Remote Sensing and Satellite Imagery, ka rynsan ai jingtip ïa ki nongjngohkai kaba don nongrim ha ka GIS bad ka jingpeit ïa ka jingduna ha ka jingïasoh lyngba ki surok.
Ka jingkyntiew ïa ka jingwad bniah bad ki jingsaiñdur thymmai ha ki kam kiba ïadei bad ka jingkylla ka suiñ bneng, ki teknoloji ba saiñ dur thymmai, ka jingbuh jingtip shaphang ki rukom im tynrai, ki rukom thoh dak bad ki ktien kiba don ha ka jingma ban duh jait bad ki jaka ba sahdien bad ka Data Centre bad ruh kawei ka jaka pdeng ban ïoh jingtip shaphang ki lad kamai jakpoh.
U Chalai u la ong ba ka NEC ka dei kaba don bynta ha ka jingsdang bun ki projek kiba heh kum ka Regional Institute of Medical Sciences (RIMS), Imphal, North East Police Academy (NEPA) Shillong, North Eastern Electrical Power Corporation Ltd. (NEEPCO) Shillong, ka North Eastern Region Agriculture Marketing Corporation (NERAMC) Guwahati, North Eastern Regional Institute of Science bad Technology (NERIST) Itanagar, Regional Institute of Paramedical bad Nursing Sciences (RIPNS) Aizawl, North Eastern Regional Institute of Water and Land Management (NERIWLM) Tezpur, ka Lokpriya Gopinath Bordoloi Regional Institute of Mental Health (LGBRIMH), Tezpur, North Eastern Space Application Centre (NESAC) Shillong, Bhubaneswar Borooah Cancer Institute, Regional Dental College (BBCIRD) Guwahati, Regional Nursing College (RNC) Guwahati, Regional Institute of Pharmaceutical Science bad Technology (RIPST) Agartala bad ka Cane and Bamboo Technology Centre (CBTC) ha Guwahati.
U la ai jingtip ïa ka kynhun ba la shna 11,432.00 kilomitar ki surok da ka jingbei pisa jong ka NEC ha ka thaiñ Shatei Lammihngi. ka la ai jingïarap ban buh ïa ki jaka pynmih bording ba 694.5 megawatt bad ka jingshna 10,341.63 Circuit Kilomitar ki sainar pynpur bording, ka jingshna 11 tylli ki Inter-State Bus Terminus (ISBT) bad ka jingkyntiew ïa ki jingdon jingem ha 5 tylli ki kad liengsuiñ jong ka thaiñ.
Ka la ai jingkyrshan ïa ka North Eastern Region Community Resource Management Project (NERCORMP) ka projek na ka bynta ki kam kamai jakpoh ba lah ban ïaineh ryngkat ka jingkyrshan na ka IFAD.
Ka Deputy Director, PIB Mumbai ka Jayadevi bad u Deputy Director ka DDK Shillong u Sarnag Pofale, M&CO PIB u Gopajit Das bad ki ophisar jong ka NEC ki la ïadonlang ha kane ka jingïalang.
