Khliehriat, Jymmang, 02: Ki Pulit ka East Jaiñtia Hills District kiba la pynlong ka jingtalasi kai ha surokbah National Highway-6 ha ka sngi Balang ha ka por kumba 5:30 baje janmiet ki la pynsangeh ïa kawei ka kali Maruti S-Presso (Tourist) kaba don ïa u nombar ML04-B-6638 bad na kane ka kali ki Pulit ki la ïoh ban kurup ïa u drug Heroin bad ki dawai kuli beaiñ.
Ki Pulit ki la ïathuh ba ki la ïohbat ïa kane ka kali katba ka dang wan na ki thaiñ Kalaiñ, Assam bad ki don hynñiew ngut ki briew bashong hapoh kane ka kali.
Ha ka jingtalasi ïa ka kali, ki Pulit ki la lap ïa kawei ka bek plastik kaba la buhrieh hapoh ka Seat jong u nongñiah kali bad ynda la plied la lap ïa ka synduk thep sabon kaba don ïa u kynja powder rong sawbyrtem ïa uba la suba ba u dei u Drug Heroin uba khia 9.9 grams.
Shuh shuh ki Pulit ki la lap ruh sa kawei ka plastik rong iong ba la thep 24 song ki dawai kuli Nitrajepam tablet ba don 10 tylli ki dawai kuli bad kiba khia 2.4 gram.
Ki Pulit ki la kem noh ïa u Jowel Dkhar, 20 snem ka rta na ka shnong Moolamanoh, East Jaiñtia Hills District bad register case pyrshah ïa u ha Lumshnong Police Station.
