Shillong, Jymmang, 02: Ka Hynñiewtrep Youths Council (HYC) ka la ïaiban ïa ki bor ba dei peit ban kyndang ïa ki poiwir kiba sah be-aiñ ha Lum Survey kaba don mar pyrshah bad ka Fire and Emergency Station, Iewduh, Shillong.
Ha ka shithi ba la phah sha u Deputy Commissioner ka East Khasi Hills District, sha ka Defence Estate Officer, Guwahati Circle, Narangi Military Station bad sha u Chief Executive Officer (CEO) ka Shillong Cantonment Board (SMB) ka seng ka la pyntip ba ka jingjurip ha ka 25 tarik u bnai baladep ka la lap ba ki don kumba 80-100 tylli ki longiing kiba sah ha kane ka jaka khlem ka jingïoh jingbit na ka Cantonment Board lane na kino kino ki bor ba dei peit.
Ka seng ka la ong ba kane ka jaka sah ka long kaba isaitmet na ka bynta ka nongbah Shillong bad ka Jylla baroh kawei.
“Ngi la ïoh jingtip ba kane ka jaka ka dei ka ktem jong ki kam runar ruser kum ka jingkhaii bad shalan ïa u drok hapoh nongbah bad ka jaka rieh tngen jong ki poiwir kiba wan na kiwei kiwei ki ri,” la ong ka seng ha ka dorkhas ba la soi da u President u Bah Roy Kupar Synrem bad u General Secretary u Bah Rhembor G. Saibon.
Hadien ba ka seng ka la ïoh jingtip na u CEO ka Shillong Cantonment Board ba kane ka jaka ka dei kaba hap hapoh ka jingkhmih jong ka Defence Estate Officer, Guwahati bad ka don ruh ka bynta jong ka jaka kaba don hapdeng ka jingïaleh mukotduma.
“Ha ka jingtohkit jong ngi, ngi la lap ki don lai tylli ki mukotduma ba dang sah pohing ha ka Kashari u District Judge, Shillong ha kaba ïadei bad ki Eviction Notice ba la ai sha ki lai ngut ki briew, kiba shong iing ha ka jaka (kaba heh kumba 200 haduh 500 sq. ft. kawei), hapoh ka Section 5 jong ka Public Premises (Eviction of Unauthorised Occupants) Act, 1971 da ka Estate Officer, Guwahati. Ngi la ïakynduh ruh ïa uwei u briew uba la ïoh ïa ka notis bad uba la ujor da ka mukotduma pyrshah ïa ka jingïoh Eviction Notice bad u la pynshai ha ngi ba ka lyngkhot jaka kaba dang sah pohding ka jingïaleh mukotduma ka dei ka jaka kaba rit bad kam dei satia ka jaka kaba heh ba la shna be-aiñ ïa ki ing tap shiliang da ki poiwir. Namarkata, ka jingkylli ba kane ka kam ka long ka jingkheiñ dewthala kam don satia bad ka jingkyndang ïa kiba sah be-aiñ lah ban leh da ki bor ba dei peit ha ki jaka bym don ka jingïaleh mukotduma,” la ong ka seng.
“Namarkata, ngi dawa ïa ka jingpynshai bad ban tip ïa ka jingshisha bad ban pynstet ïa ka kam halor ka jingujor jong ngi ïa ki briew kiba sah be-aiñ, ngi kyntu ïa phi ba phin pynlong ïa ka jingtohkit dalade ha kane ka jaka ryngkat bad ngi bad ki nongmudui mukotduma ba la kdew haneng, hapoh shi taiew naduh mynta ka sngi, khnang ban dup lah ban kyndang ïa kiba sah be-aiñ na kane ka jaka,” la ong shuh shuh ka seng.
“Lymda kumta, ngin ym don lad shuh da kumwei pat hynrei ngin leit ban leit pynshisha hi da lade ryngkat bad ki nongmudui mukotduma da ka jingsakhi lang jong ki lad pathai khubor na ka bynta ka jingtip jong ki paidbah,” la ong ka seng.
