Shillong, ïaïong, 27: Ki Pulit ka Umkiang Patrol Post, East Jaiñtia Hills District ha ka sngi Saitjaiñ ha ka por kumba 8:00 baje mynstep kiba la pynlong ia ka jingpynap shrip ha Rattachera Check Post ki khynra naphang ia ki kali kiba iaid lyngba kane ka khyrdop talasi.
Ha kane step, ki Pulit ki la iohbat ia kawei ka trok Mahindra pick-up ka bym don nombar kaba shu thoh A/F bad na kane ka kali ki Pulit ki la ioh kurup ïa u drok uba khia 900 gram bad uba shongdor haduh T.7.2 klur.
Ha ka jingkhynra ia ka kali, ki Pulit ki la lap ia kawei ka top plastik rong ïong kaba 50 liter, la suba ba lah ban thep eiei hapoh ka top bad ka jingtalasi la lap pynban ia u drok ba la song bha hapoh ki 84 tylli ki synduh thep sabon rong stem bad rong soh.
Hadien ba la leh test hakhmat ki nongsakhi la pynshisha ba u dei u drok Heroin.
Ki Pulit ki la kem ïa u nongñiah jong ka kali uba la tip kyrteng kum u Nehtinmang Haokip, 36 snem ka rta na ka shnong M. Songgel, Churachandpur District, Manipur. Ha ka jingtohkit jong ki pulit, u nongñiah u la phla ba ïa u drok la wanrah na Churachandpur, Manipur bad thmu ban pynpoi sha nongbah Shillong.
Ki Pulit ki ka kem noh ïa u nongñiah kali bad kurup noh ïa u drok, ïa ka kali Mahindra Pickup bad kawei ka mobile phone. Ki Pulit ki la register case bad pynngat hapoh ki kyndon aiñ NDPS Act bad ka jingtohkit ka dang ïaid shakhmat.
