Shillong, Jylliew 14: Kumba 600 ngut ki samla pule Graduate bad Post Graduate ki la shah pynkup burom ha ka 5th Convocation jong ka jong ka ICFAI University Meghalaya kaba la long ha State Convention Centre, Shillong ha ka sngi Thohdieng ha kaba la sakhi lang da u Myntri Rangbah ka Jylla u Conrad K. Sangma, u Myntri ka tnat Pule Puthi u Rakkam A. Sangma, u Chancellor Lt General (Dr) Arvinder Singh Lambha bad ka Vice Chancelor Dr Alicia Gatphoh bad kiwei kiwei ki kynrem ki lyndan.
Ha kane ka sngi, u Myntri Rangbah bad ki kynrem ki lyndan ki la sam ia ki khusnam General Proficiency Award, Under Graduate bad Post Graduate Merit Certificate bad ia ki khusnam sha ki samla pule kiba la ioh ia ka takma ksiar bad takma rupa ha ki jingpule ki jong ki.
U Myntri Rangbah haba kren sha sha ki samla pule kiba la pyndep ïa ki jingpule ha ki Course bapher bapher ba la tyrwa da ka University, u la ong ba ka Convocation ka dei ka khyllipmat kaba batai ïa ka jingim ki samla pule bad bynrap ba ki samla ki dei ka bor ba khlaiñ duh bad ruh ka jingtynjuh ïa kano kano ka Jylla ne ka Ri.
“Ka India ka dei ka Ri kaba kiew sted bha ha ka ïoh ka kot bad ki University bad ki jaka pule kila ïatrei ryngkat ryngkat ban saiñdur ïa ki samla ba kin don bynta ha ka jingkiew shakhmat ka ïoh ka kot da kaba shim kabu ïa ki lad ki kabu kiba donkti ha kane ka jingkiew ka ïoh ka kot,” ula ong.
U la pyntip ruh ba ki samla ki dei kiba kongsan bha ha ka jingkiew ka ïoh ka kot ha Meghalaya bad u Myntri Rangbah ula kren bniah bha halor ki katto katne ki prokram jong ka Sorkar Jylla ha ka kam jngohkai, IT bad kiwei kiwei ha kaba ki samla ki dei ïa kiba la phaikhmat duh.
U Myntri Rangbah ula kyntu ruh ïa ki samla ba kin long kiba angnud ban sengkam lyngba ki buit ba ki don bad bynrap, “Phaikhmat sha ki lad sengkam da ki buit ba phi don, ka Sorkar ka long tang ka nongplie lad plie lynti ym ka nongñiah ïa ka kali jong ka ïoh ka kot”.
