Shillong, Jylliew, 21: Ka Dorbar Shnong Mawryngkneng ha ka sngi Thohdieng ka la aiti da ka jingthoh ha u District Veterinary Officer ka East Khasi Hills da kaba tyrwa ban ai skhim jingiarap shwa ia ki nongri jingri kiba la tbit ha ka kam ri jingri ha ka shnong Mawryngkneng.
Ha ka jingiakren bad ki lad pathai khubor u Sordar jong ka shnong Mawryngkneng Bah Peter Lawai u la iathuh ba ka jingkyrpad ia u District Veterinary Officer ka long ban pynbiang ia ki dawai dashin ha ka Veterinary Dispensary ha Mawryngkneng khnang ban pynsuk ia ki nongri jingri bad iathuh ruh ba ki don ki nongri jingri kiba ladep ioh jinghikai pyntbit kiba lah ban iada ia ki jingri jingdub bad ban sumar haba wan lynshop ki khlam jingpang bapher bapher.
“Ka jingbym don ki dawai bad ki drip na ka bynta ki sniang, ki syiar, ki masi ka la pynduh mynsiem ia ki nongri jingri,” u la ong.
U la iathuh ruh ba ka jingkyrpad ka long ban kham pynbun ia ki nongtrei ha Veterinary Dispensary naduh ki Staff bad ki VFA ba kin dup lah ban ai ka jingshakri kaba kham bha ia ki nongri jingri.
Ka Dorbar Shnong Mawryngkneng ka la kyrpad ia u DVO ban pynioh ia ka Training Hall kaba pura hapoh ka Veterinary Dispensary Office khnang ban dup ai jinghikai bad jingpynshai sha ki nongri jingri ban sngewthuh kham bha ia ka kam ri jingri.
U la iathuh ruh ba ka jingkyrpad ka long ban buh ia ka Boar Semen Collection Centre bad ka Demonstration Farm
U la ong ruh haba wan ki jingmyntoi na ka sorkar, dei ban ai nyngkong shwa sha ki nongri jingri kiba la sdang la kham slem ia ka kam ri jingri bad kiba la don ia ki syrnot ba la pyndep ia ka jingshah hikai pyntbit bad kiba don ruh ia ka mon ban ri jingri bad ka jingpynshisha na u Veterinary Officer shwa ban ioh ia ka skhim ri jingri.
Kawei na ki mat kaba kham kongsan, ka dei ka jingpyniaid iew ia ki jingri. Ka Dorbar Shnong ka la kyrpad ia u DVO ban wanrah noh da ka Marketing Cell ha ka jaka jong ka Pig and Poultry Farm khnang ba kan long ka jingmyntoi hi ia ki paidbah ha ka iohkam iohjam da kaba die ia ki pylleng bad ka doh sniang.
