Shillong, Naitung, 14: Ka state committee jong ka National People’s Party (NPP) ka la mynjur ïa ka kyrteng jong ka Dr. Mehtab Chandee Sangma kaba dei ruh ka kurim jong u Myntri Rangbah ka Jylla u Conrad K Sangma ban long ruh kum ka kyrtong ka NPP na ka bynta ban aireng ha ka elekshon shiteng samoi ha Gambegre Constituency.
Ka jingmynjur ïa ka jingkyteng jong ka kurim u Myntri Rangbah ka dei ka jingdawa jong ki paidbah
Dang shen ha ka 10 tarik mynta u bnai, u National President ka NPP u Conrad K. Sangma uba long ruh u Myntri Rangbah ka Jylla u la ïathuh ba ka National Committee jong ka Party kam pat shim satia ïa ka rai ba la phah da ka State Committee ha kaba ïadei bad ka jingjied kyrtong na ka bynta ka elekshon shiteng samoi ha Gambegre Constituency.
Katkum ka jingong jong u, ïa ka kyrteng jong u kyrtong haduh mynta ka dang dei kaba ym pat lah ban pynbna paidbah.
“Ngi la ïoh ïa ka jingmynjur na ka state committee jong ka NPP hynrei ka national committee kam pat shong ban ïathir ïatai. Ynda ka national committee ka la shong ban ïakren halor ka jingtyrwa ba la phah da ka state committee ha kata ka por ngin sa shim ïa ka rai,” ong u Sangma.
