Shillong, Naitung, 16: Ka Khasi Students Union (KSU) Ranikor Circle ha ka Lah Sngi u Blei mynta ka taïew ka la pynïeng da ka khyrdop Infiltration Check Gate hapoh ka Ranikor Civil Sub-division, South West Khasi Hills District ban talasi ïa ki bar jylla kiba rung shapoh kane ka Civil Sub-Division khlem ki kot ki sla kiba biang.
Shwa kane, ka KSU ka la pynieng ïa ka khyrdop talasi mynder ha ka surokbah National Highway-6 ha ka shnong Umkiang, ha Pahammawleiñ, Ribhoi District bad ha ka shnong Athiabari, West Khasi Hills District.
U President jong ka KSU Ranikor Circle u samla Marconi Thongni ha ka jingïakren bad ki lad pathai khubor u la ong, “ngi sngewkyndit ban ïohi ba u Myntri Rangbah ka Jylla u ong ba ym donkam ïa ka Work Permit bad kam shym la don.”
“Ka Work Permit ka dei kaba la pyntreikam naduh ka por ba dang synshar ka Congress ba kiwei ki briew kiba wan na kiwei ki jylla jong ka ri India haba ki wan sha kane ka jylla bad (khamtam) ki Kontraktor haba ki wan ïalam ïa ki nongbylla blar jyla ki dei ban rejistar bad ki dei ban pynïoh shwa ïa ka Work Permit bad ngim kwah ban ïohi ba ka jylla jong ngi kan shu long laitlan bad ngi da kwah ruh ba Sorkar ka dei ruh ban pyntreikam ïa ki aiñ kiba la don lypa,” ula ong.
U la kynthah ruh ïa ka Sorkar da kaba ong, “ynda ngi la mih shakhmat ban khynra ïa ki nongbylla kiba wan na kiwei ki jylla ngi ïohi ba ka Sorkar ka ong ba ngim donhok. Lada ngi ïohi ïa ki bor Sorkar ban leh ïa kane, nga tharai ngim donkam ba ngin mih sha surok namarba ka dei ka kamram jong ki pynban ka jingbym shimkhia jong ki kaba la pynlong ïa ngi ban mih shakhmat ban khynra namarba ngi ïohi ïa ka jingma naba ngi dei ka jaidbynriew kaba ritpaid bad ngim kwah ba ngin kylla ritpaid ha la ka jong ka ri.”
“Ngi sakhi ïa ka jylla Tripura ba ki trai jaka ki la kylla ritpaid bad ngi i sangsot haduh katta katta bad ngi la ïohi shibun ki jingeh ba ki ïatyngkhuh haba la long trai da kiwei ki jaidbynriew hapoh ka Tripura hynrei ki trai jylla kim don bor shuh wat ban mih sha surok ban ïakhih ïa ka hok lajong ki la shah khniot haduh katta katta,” la ong shuh shuh une u nongïalam ka KSU.
“Ka KSU kam kwah ban ïohi kum kine ba kin jia bad ngin ïai khynra ïa ki mynder kiba wan nabar ka jylla ban trei bylla khlem kano kano ka aiñ kaba teh ïa ki. Ka seng nangne shakhmt kan ïai pynjur ïa ka jingkhynra bad ngin ïai peit pyrman hi ïa kine kiei kiei baroh. Ngim donkam ban da pan bor nangno nangno hynrei kane ka dei ka ri jong ngi kaba ngi hap ban ri bad ban sumar namar lada ngi sngewkhia lada ma ngi, ngin kylla ritpaid ha la ka jong ka ri shano ngin phet bad ngi sngewthuh ba dei tang kane ka khyndew kaba u Blei u la ai ïa ngi ba ngi hap ban sumar bad ba ngin long trai ïa la ka khyndew ka shyiap,” u la bynrap.
Haba kynthah ïa ka jingkren ba dang shen jong u Myntri Rangbah ka Jylla u Conrad K. Sangma, u nongïalam ka KSU u la ong, “ngi sngew ban ong ïa u Myntri Rangbah, kein noh ïa ka jingïada mynder jong phi ban ïada ïa ki briew kiba nabar bad ban khnoit ïa ngi ki trai ri bad na ka liang jong ka seng hi kan ym ailad lano lano ruh ïa ki buit poh jong phi bad ngin ym riej ngin ym tieng hynrei ngin mih beit shakmat ban ïada ïa ka jaidbynriew.”
