Shillong, Naitung, 17: Ka skulbah North Eastern Hill University (NEHU) ha ka sngi Balang ka la rakhe kynmaw burom ïa ka lyngkhuh sngi ïap kaba 189 snem jong u Syiem Tirot Sing da ka jingïashim bynta jong ki nonghikai, ki samla pule bad ki nongtrei ophis ka skulbah.
U Prof. S. Umdor na ka Department of Economics u la ai ka jingkren kaba jylliew halor “ka jingim bad ka jingïaleh laitluid jong u Syiem Tirot Sing,” da kaba pynpaw ïa ka jingaiti jong u riewthma bad ki buit thma kaikhlaw pyrshah ïa ki Phareng.
U Prof. Umdor u la pynshai ïa ka jingdonkam ban rakhe ïa kane ka sngi bad u la ïaroh ïa ki riewstad bad ki nongpynïaid ha kane ka juk kiba la pynshai ïa ki riewshlur jong ka ri India kiba kham duna ka jingtip.
U Col. Omkar Singh (Retd), u Registrar, u la pynpaw ïa ka jingdonkam jong ka jingstad synshar ka juk mynta bad ïa ki jinghikai kiba lah ban ioh na ka jingpyrshang shlur jong u Tirot Sing na ka bynta ka lawei kaba bha.
U la ban jur ïa ka jingdonkam ban shim jinghikai na ka histori ban tei ïa ka imlang sahlang kaba kham hok bad kaba ïaryngkat.
U Prof. Devendra Nayak, na ka tnad Geography bad uba dei ruh Vice-Chancellor Incharge, u la ïaroh ïa ki nongïashim bynta kiba la trei shitom ban pynshai ïa ka jingim bad ki jingïaleh jong u Tirot Sing Syiem.
U la pynpaw ïa ka jingdonkam ba ki samla kin tip ïa ki jingnoh synniang jong ki riewshlur bym pat pawnam bad u la khot ban wad bniah shuh shuh ïa kine ki nongïaleh laitluid, kiba bunsien la ju weng noh ïa ki jingïathuhkhana jong ki na ki kot histori ba pawnam.
U Prof. Nayak u la kyntu ïa ka NEHU Students’ Union (NEHUSU) ban shim ïa ka bynta kaba hakhmat eh ban pynlong ïa ki prokram bad ban pynsngewthuh shaphang ki nongïaleh laitluid.
U la pynthikna ba ka skulbah kan kyrshan pura ïa kum kine ki jingthmu.
Shwa ïa kane, General Secretary jong ka NEHUSU u samla Toniho S. Kharsati, u la ban jur ïa ka jingdonkam jong ka jinglaitluid, ka jingbishar hok, bad ki kam babha hapoh bad shabar jong ka NEHU, da kaba kyrshan ïa ka jingroi kaba pura kaba la pynshlur da ka jingim jong ki nongïaleh laitluid.
