New Delhi, Naitung, 19: U Myntri ka tnat Kam Pohiing ka Sorkar Pdeng, u Amit Shah ha ka sngi Thohdieng u la pynïaid ïa ka jingïalang bad ki khliehduh jong ki kynhun Security bad ki kynhun kiba pyntreikam ïa ka ain ban peit bniah ïa ka jingtreikam jong ka Multi Agency Centre (MAC) jong ka IB, kaba dei peit ban weng ïa ki jingeh ba ïadei bad ka jingshngain ha ka ri, ha New Delhi mynta ka sngi.
Ha ka jingai jingkren ha ka jingïalang u Myntri Kam Pohiing u la bthah ïa ki heh duh bapher bapher jong ki kynhun Security na kylleng ka ri bad kiwei kiwei ki kynhun kiba ïadei bad ka jingtip bad ka jingpyntreikam ïa ka ain ban pdiang ïa ka rukom treikam ba pura jong ka Sorkar na ka bynta ka jingshngain jong ka ri. U la ban jur ïa ka jingïatreilang hapdeng baroh ki kynhun ban weng ïa ki rynsan kam pyntriem bad ki jingkyrshan ïa ki, ban peit ïa ka kam ai jingshngain kaba dang kylla ha ka ri.
Ha ka jingpeit bniah ïa ka jinglong ka jingshngain hapoh ri bad ka jingïakhun pyrshah ïa ki kam pyntriem; u Myntri Kam Pohiing u la bthah ïa baroh ki nongïashim bynta ban kyntiew ïa ka jingïatreilang bad ka Multi Agency Centre bad pynlong ïa ka kum ka rynsan kaba wanrah lang ïa baroh ki kynhun kiba pyntreikam ai ka ain, ki kynhun kiba ïaleh pyrshah ïa ki drok bad ki kynhun wad jingtip khnang ban ïoh shim ïa ki sienjam kiba sted.
U Myntri Kam Pohiing u la ban jur ba ka MAC ka la ïoh ka jingshaniah jong baroh kiba ïatreikam hapoh jong ka bad kadei ban bteng ban trei baroh arphew saw kynta kum ka rynsan na ka bynta ka jingïasam ïa ki jingtip hapdeng kito kiba ïadon bynta ha kane ka kam ba kynthup ruh ïa kito kiba don ha ki jaka kiba jngai.
Ha ka jingïalang, u Myntri Kam Pohiing u la ban jur halor ka jingthung ïa ka kynhun jong ki samla, ki ophisar ba tbit ha ki kam teknikal na baroh ki kynhun ba don bynta ha ka jingshngain jong ka ri ban pyndonkam ïa ka Big Data bad ka analytics ba don nongrim ha ka AI/ML bad ki jingjam shaphrang ha ka teknoloji ban weng ïa ki kam pyntriem. U la ong ba hapdeng ki jingeh kiba thymmai, ngi dei beit ban long kiba la kham pynkhreh ha ki rukom pynbeit jong ngi.
U Myntri Kam Pohiing u la pyntip ruh ba hapoh ka jingïalam jong u Myntri Rangbah duh, Narendra Modi, yn don ka jingpynkylla ïa ka rukom treikam ka MAC khnang ban pynïar bad pynseisoh shuh shuh ïa ki kam. U la kyntu ïa baroh kito kiba don bynta ha kane ka kam ban pynkhlain shuh shuh ïa kine ki sienjam lyngba ki sienjam kiba sted bad ka jingbuddien ïa ki jingïoh jingtip.
